Read Lamkang Левит 11 Bible Online

Левит 11 - Lamkang bible

Левит 11

¹И му рече Господ на Мојсеја и на Арона, велејќи:

²»Кажете им на синовите Израилеви и речете им: ова се животните што ги има на земјата, кои можете да ги јадете —

³секое животно што има раздвоени копита и длабок рез меѓу копитата, и кое прежива, тоа да го јадете.

⁴Но од оние што само преживаат или само што имаат раздвоени копита, како што е камилата, да не јадете, бидејќи прежива, но нема и раздвоени копита; таа е за вас нечиста.

⁵И питом зајак, бидејќи прежива и нема раздвоени копита, нечист да ви е,

⁶и див зајак кој прежива, а нема раздвоени копита, нечист да ви е,

⁷и свињата, бидејќи има раздвоени копита, а не прежива — нечиста да ви е.

⁸Од месото нивно да не јадете, ниту, пак, мршите нивни да ги допирате — тие се за вас нечисти.

⁹А од си она, пак, што е во вода ова јадете го: — си што има перки и лушпи во водата, во морињата и езерата, јадете го.

¹⁰Она, пак, што нема перки и лушпи во водата, во морињата и езерата, сѐ она што плива по вода и живее во вода, осквернето е и нечисто да ви е.

¹¹Од месото нивно да не јадете и од мршата нивна да се гнасите.

¹²Си што нема перки и лушпи во водата, тоа да ви е нечисто.

¹³А меѓу приците гнасете се и да не ги јадете, гнасни се — орелот и јастребот и морскиот орел, неситот, крагујот и слични на нив;

¹⁴и нојот, и совата, и галебот,

¹⁵и врапчето,

¹⁶и секаков гавран и сличен нему, и јастребот и слични нему

¹⁷и секаков буф, нуркач и ибис и слични на него;

¹⁸и пеликанот, и лебедот, дропјата

¹⁹и штркот, и чапјата и слични на нив, и пупунецот и лилјакот;

²⁰и сите крилести гадови што одат на четири нозе, да ви се одвратни.

²¹Но од си она што има крилја и оди на четири нозе, а има и колена на нозете свои, за да скока по земјата, јадете.

²²Од нив јадете ги само овие: скакулците и слични на нив, салемот и слични на него, арголата и слични на неа, и агавата и слични на неа.

²³Си друго што има крилја и оди на четири нозе одвратно да ви е; со тоа да не се осквернувате.

²⁴И секој што ќе се допре до нивно пцовисано тело, нечист ќе биде до вечерта.

²⁵И секој што ќе понесе нивно пцовисано тело, нечист ќе биде до вечерта.

²⁶Сите животни што имаат нераздвоени копита и што не преживаат, нечисти да ви се; секој што ќе се допре до такви пцовисани, нечист ќе е до вечерта.

²⁷И си што оди на лапите свои, меѓу сите четвороножни животни, нечисто да ви е; кој ќе се допре до трупот нивни, нечист ќе биде до вечерта

²⁸И кој ќе понесе труп нивни пцовисан, нека ја испере облеката своја и нечист е до вечерта; тие да ви бидат одвратни.

²⁹А меѓу животните што лазат по земја да ви бидат нечисти: ласицата, глувчето и гуштерот,

³⁰и ежот и камелеонот, дождалецот, творот, полжавот и кртот.

³¹Тие да ви се нечисти меѓу животните што лазат по земјата, и кој ќе се допре до нив пцовисани, нечист да е до вечерта.

³²И на кои или на што ќе падне нешто од нив пцовисано, ќе биде нечист, било да е сад дрвен или облека или кожа или вреќа, и секој сад што е потребен за некоја употреба, да се стави во вода и ќе биде нечист до вечерта; потоа ќе биде чист.

³³А и секој сад земјен, во кој ќе падне нешто од тоа, и си што ќе е во него, ќе биде нечисто, и садот скршете го.

³⁴И секое јадење што го јадете, ако на него се излие таква вода, ќе биде нечисто, и секое питие што се пие во секој таков сад, ќе ви биде нечисто.

³⁵И си на што ќе падне нешто од нивните пцовисани тела нечисто ќе е; и печката и огништето нека се растурат, зашто се нечисто, и нечисто ќе ви бидат.

³⁶А освен изворот, потоците и бунарот, каде што се собира водата, ќе бидат чисти; но си што ќе се допре до пцовисан труп, ќе биде нечисто.

³⁷Ако нешто, пак, од пцовисан труп падне на семе, што се сее, тоа ќе ви биде чисто.

³⁸Но ако на семето се излие вода, па тогаш падне нешто од пцовисан труп на семето, тоа да ви биде нечисто.

³⁹И кога ќе пцовиса што и да е од она од добитокот што го јадете, ако некој се допре до неговиот труп, нечист ќе биде до вечерта.

⁴⁰А оној што ќе јаде од трупот негов, нека ја испере облеката своја и нечист ќе е до вечерта; и кој ќе фати нивни пцовисан труп, нека ја испере облеката своја и нечист ќе е до вечерта.

⁴¹И секаков гад што лази по земјата, да ви е одвратен и да не се јаде.

⁴²Си што се влече на мев и си што оди на четири нозе или што е со многу нозе меѓу си она што се влече по земјата, тоа да не го јадете, бидејќи е нечисто.

⁴³Не поганете ги душите ваши со ниедно од животните што лазат и не осквернувајте се од нив, за да не бидете нечисти со нив,

⁴⁴зашто Јас сум Господ, вашиот Бог, осветувајте се и бидете свети, бидејќи Јас сум свет; и немојте да се осквернувате од сите гадови што се движат по земјата.

⁴⁵Оти Јас сум Господ што ве изведе од земјата Египетска, за да ви бидам Бог; и така — бидете свети, зашто Јас сум свет.

⁴⁶Тоа е закон за добитокот и за птиците, и за секоја душа што се движи во вода, и за секоја душа што лази по земја,

⁴⁷за да се распознава чистото од нечистото и за да ги научите синовите Израилеви за животните кои можат да се јадат од животните што не треба да се јадат.«