Read Lamkang Левит 18 Bible Online

Левит 18 - Lamkang bible

Левит 18

¹И му рече Господ Бог на Мојсеја, велејќи:

²»Кажи им на синовите Израилеви и речи им: Јас сум Господ Бог ваш.

³Не постапувајте според делата на Египетската земја, во која живеевте, не постапувајте ни според делата на земјата Хананска, во која ве водам, и не управувајте се според нивните закони.

⁴Извршувајте ги сите Мои наредби и пазете ги сите Мои заповеди, одете по нив, Јас сум Господ, Бог ваш.

⁵Пазете ги сите Мои наредби и сите заповеди и извршувајте ги, и секој што ги извршува жив ќе биде, Јас сум, Господа, Бог ваш.

⁶Никој не смее да се доближува до сродниците по тело, за да ја открие голотијата нивна. Јас сум Господ.

⁷И голотијата на таткото свој и голотијата на мајката своја да не ја откриваш; таа ти е мајка, не откривај ја голотијата нејзина.

⁸Голотијата на татковата жена не откривај ја: таа е таткова голотија.

⁹Голотијата на сестрата твоја, која е од татка ти или од мајка ти твоја, родена во куќата или надвор од куќата, да не ја откриваш голотијата нејзина.

¹⁰Голотијата од ќерката на синот твој или од ќерката на ќерката твоја, не откривај ја голотијата нивна, зашто тие се твоја голотија.

¹¹Голотијата на ќерката од татковата жена, не откривај ја, таа ти е сестра по татко.

¹²Голотијата на татковата сестра не ја откривај; таа е од иста крв со таткото твој.

¹³Голотијата на мајкината сестра не ја откривај, таа е од иста крв со мајката твоја.

¹⁴Голотијата на татковиот брат не ја откривај и до неговата жена не се доближувај, таа ти е стрина.

¹⁵Голотијата на снаата своја не ја откривај, таа е жена на твојот син — затоа не ја откривај голотијата нејзина.

¹⁶Голотијата на братовата жена не откривај ја, таа е голотија на братот твој.

¹⁷Голотијата на жена и на ќерка и не ја откривај; ќерката на синот нејзин и ќерката на ќерката нејзина не ги земај, за да ја откриваш голотијата нивна: тие се од иста крв; тоа е беззаконие.

¹⁸Не земај ја за наложница сестрата на твојата жена за да ја откриеш голотијата нејзина пред неа, си уште додека е жива таа.

¹⁹И до жена, си додека трае чистењето од нечистотијата нејзина, не доближувај се за да ја откриеш голотијата нејзина.

²⁰И со жената на ближниот твој не легнувај, за да излееш семе и да се оскверниш со неа.

²¹Од децата свои не му давај жртва на Молоха и не го обесчестувај светото име. Јас сум Господ.

²²Не легнувај со маж, како со жена: тоа е одвратност.

²³И со ниедно четвороножно животно не легнувај за да излееш семе, па да се оскверниш со него; и жена не смее да легнува по ниедно четвороножно животно, за да се спои со него: тоа е гнасотија.

²⁴Не осквернувај се со сево ова, затоа што со сето тоа се оскверниле народите, кои Јас сакам да ги отфрлам од вас;

²⁵и земјата се оскверни од нив, и Јас ги казнив поради неа, и така земјата ги исфрли своите жители.

²⁶А вие пазете ги сите Мои закони и сите Мои повелби и не вршете ниедно од сите овие гнасотии, ниту вие овдешните, ниту придојдените кои живеат меѓу вас,

²⁷зашто сите тие гнасотии ги правеа луѓето на таа земја, што беа пред вас, и земјата се оскверни;

²⁸за да не се налути земјата и на вас, кога ќе ја оскверните, па да не ве исфрли, како што ги исфрли народите што беа пред вас.

²⁹Зашто сите, што ги вршат овие гнасотии, ќе бидат истребени од народот свој.

³⁰И така, пазете ги сите Мои повелби за да не извршувате ниеден од нивните гнасни закони, како што постапуваа оние што беа пред вас, и да не се оскверните со нив, оти Јас сум Господ, Бог ваш.«