Read Lamkang Левит 20 Bible Online

Левит 20 - Lamkang bible

Левит 20

¹И му рече Господ на Мојсеја, велејќи:

²»Кажи им на синовите Израилеви, говорејќи: ако некој од синовите Израилеви или од придојдените, кои живеат меѓу Израилците, му даде жртва на Молоха од децата свои, да умре; народот од земјата со камења да го убие.

³И Јас ќе го свртам лицето Мое против тој човек и ќе го истребам од народот негов, затоа што му дал на Молоха жртва од децата свои, за да го оскверни Моето светилиште, и да се оскверни името на оние што сум ги осветил.

⁴И ако народот од земјата ги затвори очите пред тој човек, кога ќе му даде ма Молоха жртва од своите деца, и не го убие,

⁵тогаш Јас ќе го свртам лицето Мое против тој човек и неговиот род, ќе ги истребам и сите едномисленици, што ќе го следат во блудството негово со идолите на тој народ.

⁶И ако некоја душа тргне по оние што гатаат на животински црева, и по магесници, за да го следат нивното блудство, Јас ќе го свртам лицето Мое против таа душа и ќе ја истребам од народот нејзин.

⁷Бидете свети, зашто Јас, вашиот Господ Бог, сум свет.

⁸Пазете ги Моите повелби и извршувајте ги, оти Јас сум Господ, Кој ве осветува.

⁹Човек, кој го навредува таткото свој или мајката своја да биде убиен; тој што го злословува таткото свој или мајката своја: виновен е.

¹⁰Ако некој изврши прељуба со мажена жена или со жената на ближниот свој — да бидат убиени и прељубодеецот и прељубодејката.

¹¹Кој ќе легне со жената на таткото свој, тој ја открил голотијата на татка си; обајцата да бидат убиени; виновни се.

¹²Ако некој легне со снаата своја, и обајцата да бидат убиени, тие извршиле нечисто дело — виновни се.

¹³Ако некој легне со маж како со жена, и обајцата извршиле гнасно дело: да бидат убиени, виновни се.

¹⁴Ако некој се ожени со ќерка или мајката нејзина, тоа е беззаконие: со оган да бидат изгорени и тој и таа, за да нема беззаконие меѓу вас.

¹⁵А, ако некој пристапи кај некое животно, за да се соедини со него, убиј го него и животното: тие треба да бидат убиени — виновни се.

¹⁶И жена ако пристапи до животно, да се соедини со него, да ги убиете и жената и животното — да умрат, виновни се.

¹⁷Ако некој ја земе сестрата своја, или татковата ќерка, или мајкината ќерка, и ја види голотијата нејзина, и таа ја види голотијата негова: тоа е срам; да бидат истребени од својот народ: тој ја открил голотијата на сестрата своја — затоа ќе го прими гревот свој врз себе.

¹⁸Ако некој легне со жена кога е нечиста од излив на крв, и ја открие голотијата нејзина, изливот на нејзината крв, и таа го открие изливот на својата крв: и обајцата да бидат истребени од народот свој.

¹⁹Голотијата од мајкината сестра и голотијата од сестрата на твојот татко не откривај ја, зашто тој открива родбинска голотија, тие гревот свој ќе го носат врз себе.

²⁰И ако некој легне со роднина своја, тој ја открил Голотијата на родот свој: нека умрат без деца.

²¹Ако некој ја земе братовата жена: тоа е гнасно дело; тој ја открил голотијата на братот свој, и обајцата ќе умрат без деца.

²²Запазете ги сите Мои повелби и сите Мои заповеди и извршувајте ги — и нема против вас да вознегодува земјата, во која ве водам да живеете во неа.

²³Не постапувајте според законите на незнабошците што ќе ги изгонам пред вас; затоа што тие сето тоа го правеа, Јас вознегодував против нив,

²⁴и ви реков; вие ќе ја наследите земјата нивна и вам ќе ви ја дадам во владение земјата, каде што тече мед и млеко. Јас сум Господ, Бог ваш, Кој ве оддели од сите народи.

²⁵Правете разлика меѓу чист и нечист добиток, и меѓу чиста и нечиста птица, и не ги осквернувајте душите свои со добиток и со птица и со она што лази по земјата, она што ви го одвоив како нечисто.

²⁶Ќе ми бидете свети, затоа што сум Јас, Господ вашиот Бог, свет, Кој ве одделив од сите народи за да бидете Мои.

²⁷Маж или жена, ако извикува духови на мртви, да бидат убиени; со камења да ги убиете, виновни се.«