Read Lamkang Левит 25 Bible Online

Левит 25 - Lamkang bible

Левит 25

¹И му рече уште Господ на Мојсеја, на планината Синај, велејќи:

²»Јави им на синовите Израилеви и кажи им: кога ќе дојдете во земјата, што ви ја давам Јас, земјата што ви ја давам нека ја празнува саботата Господова;

³шест години засејувај ја нивата своја и шест години режи го лозјето свое и прибирај ги плодовите нивни,

⁴а во седмата година е сабота за земјата — нека има одмор земјата; тоа е сабота Господова: не ја сеј нивата своја и не го режи лозјето свое.

⁵Она што само ќе израсне на нивата твоја, не го жнеј, и грозјето од нережаните лози твои не собирај го: нека биде тоа година за починка на земјата.

⁶И за време починката на земјата тоа нека биде храна за сите вас — за тебе и за твојот роб, за робинката твоја, за наемникот твој и за придојдениот, населен кај тебе;

⁷а добитокот твој и за ѕверовите што се на земјата твоја, тие плодови нека им бидат храна.

⁸И изброј седум саботни години, седумпати по седум, за да ти излезат во седумте седмици четириесет и девет години;

⁹и објавете го со трубен глас по целата земја ваша седмиот месец, во десеттиот ден од месецот; во денот на очистувањето затрубете со труба по целата земја ваша;

¹⁰и осветете ја педесеттата година и објавете слобода по земјата за сите жители; тоа да ви биде година на проштавање; и секој да се врати во својот имот, и секој да се врати при родот свој.

¹¹Педесеттата година да ви биде година на проштавање; во таа година не сејте и не жнејте го она што ќе израсне само од земјата, и да не го собирате она што Му е свето на Господа,

¹²зашто тоа е знак за опростување: свето да ви е тоа — од нивите јадете ги плодовите нивни.

¹³Во таа проштална година секој нека се врати на имотот свој.

¹⁴Ако си му продал нешто на ближниот свој, или ако си купил нешто од ближниот свој, не оскрбувај го ближниот свој;

¹⁵ти треба да купуваш од ближниот свој според бројот на годините по прошталната, и според, бројот на годините на приходот тој треба да ти продава;

¹⁶ако остануваат многу години, зголеми ја цената; ако оставаш за малку години, намали ја цената; според бројот на годините определи ја цената.

¹⁷Не оскрбувај го ближниот свој; бој се од твојот Господ Бог, зашто Јас сум Господ, вашиот Бог.

¹⁸Извршувајте ги заповедите Мои, пазете и исполнувајте ги законите Мои, и спокојно ќе живеете на земјата;

¹⁹и земјата ќе ги дава своите плодови, и ќе јадете до наситка и спокојно ќе живеете на неа.

²⁰Ако кажете: што ќе јадеме во седмата година, кога не сме посеале ништо, не сме собрале производи наши,

²¹Јас ќе испратам благослов Мој во шестата година, и таа ќе даде плод за три години;

²²а во осмата година ќе сеете, па ќе јадете од старите производи до деветтата година; и додека не узреат плодовите нејзини, ќе јадете од старото.

²³Земјата не смее да се продава засекогаш, зашто земјата е Моја; вие сте при Мене придојдени и преселеници;

²⁴по целата земја на вашите имоти дозволувајте земјата да се откупува.

²⁵Ако брат ти, кој е кај тебе, осиромаши и го продаде својот имот, тогаш да дојде неговиот најблизок роднина и нека го откупи продаденото од братот негов.

²⁶Но, ако нема свој, кој да го откупи, тој самиот ќе успее и ќе најде колку што треба за откуп;

²⁷тогаш да ги пресмета годините од продажбата своја и да го врати другото на оној кому му го продал, и повторно да влезе во владението свое.

²⁸Ако, пак, не најде колку што треба, за да врати, продаденото нека остане во рацете на купувачот си до шестата проштална година, а во светата година да стане слободно и повторно да влезе во имотот свој.

²⁹Ако некој продаде куќа за живеење во град ограден, таа може да се откупи сѐ додека не измине годината на продажбата нејзина — во текот на годината таа може да се откупи.

³⁰Ако, пак, не се откупи додека не измине годината од продажбата нејзина, куќата што е во градот, со тврда ограда, засекогаш ќе остане во рацете на купувачот и родот негов, и нема да му се врати во прошталната година.

³¹А куќите по селата, што не се оградени наоколу, треба да се сметаа за ниви; тие секогаш ќе можат да се откупуваат, но во прошталната година ќе се вратат.

³²А што се однесува до градовите на левитите, куќите во градовите на владението нивно, секогаш можат да ги откупуваат левитите;

³³ако некој од левитите нема средства да откупи, тогаш продадената куќа во градот на нивниот имот ќе биде вратена во времето на прошталната година, зашто куќите во градовите на левитите се нивно владение меѓу синовите Израилеви.

³⁴А селата околу нивните градови не смеат да се продаваат, зашто тие се нивно вечно владение.

³⁵Ако братот твој осиромаши и изнемогне при тебе, поткрепи го исто така како да е твој придојден или преселеник, та да живее кај тебе.

³⁶Не земај му ни лихва ни печалба, и бој се од твојот Бог; Јас сум Господ; братот твој нека живее при тебе.

³⁷Не давај му сребро свое со интерес, а и храната твоја не давај му ја со печалба.

³⁸Јас сум Господ, Бог ваш, Кој ве изведе од Египетската земја за да ви ја дадам земјата Хананска и да бидам ваш Бог.

³⁹Кога ќе осиромаши кај тебе братот твој, и ти се продаде, не товари го со ропска работа;

⁴⁰тој треба да ти биде како наемник, како преселник, нека ти работи до прошталната година,

⁴¹а тогаш нека си отиде од кај тебе, тој самиот и децата негови со него во прошталната година, и нека се врати меѓу родот свој и пак да влезе во имотот на татковците свои,

⁴²бидејќи тие се Мои слуги, кои Јас ги изведов од Египетската земја: тие не смеат да се продаваат како што се продаваат робовите.

⁴³Не товарај го со многу работа и бој се од твојот Господ Бог.

⁴⁴Ако сакаш да имаш свој роб и своја робинка, купувајте си роб и робинка од народите што се околу вас; од нив да си земате робови и робинки.

⁴⁵Исто така и од децата на преселниците, населени меѓу вас, можете да купувате; и од нивните роднини во земјата ваша ако ги има, и тие да ви бидат сопственост.

⁴⁶Можете да ги предавате во наследство и на синовите ваши по вас како вечен имот; а браќата ваши, синовите Израилеви, не обременувајте ги со многу работа.

⁴⁷Ако твојот придојден или твојот преселник се збогати, а братот твој пред него осиромаши и му се продаде на придојдениот, населен при тебе, или на некој друг од родот на придојдените,

⁴⁸тогаш по продажбата тој може да биде откупен; некој од браќата негови треба да го откупи,

⁴⁹или братот на неговиот татко, или синот на стрикото негов треба да го откупи, или кој и да било од родот негов во племето, да го откупи, или самиот тој, ако се снајде да се откупи.

⁵⁰И да се пресмета со купувачот свој, сметајќи од годините, кога се продал, па си до прошталната година, и да го врати среброто за кое се продал според бројот на годините, при што да се пресмета и тоа дека кај него бил и како наемник — според бројот на годините,

⁵¹и ако остануваат уште многу години, тогаш сразмерно на нив да го врати својот откуп во сребро, за кој бил купен;

⁵²ако, пак, остануваат уште малку години до прошталната година, да пресмета и сразмерно на годините на служењето да плати за својот откуп.

⁵³Во текот на сите години тој да биде кај него како наемник, но тој не треба да биде преоптоваруван со работа пред твоите очи.

⁵⁴Ако, пак, не се откупи на тој начин, тогаш во прошталната година да излезе самиот тој и децата негови со него,

⁵⁵затоа што синовите Израилеви се Мои слуги; тие се Мои деца, што ги изведов од Египетската земја. Јас сум Господ, вашиот Бог.«