Read Lamkang Јеремија 26 Bible Online

Јеремија 26 - Lamkang bible

Јеремија 26

¹Во почетокот од царувањето на јудејскиот цар Јоаким, син Јосиев, дојде ова слово од Господа —

²вака вели Господ: застани во дворот на домот Господен и кажи им на сите градови во Јудеја, кои доаѓаат да се поклонат во домот Господен, сите оние зброви што ќе ти заповедам да им ги кажеш; ниеден збор да не пропуштиш.

³Можеби, тие ќе те послушаат и ќе се отклонат секој од својот лош пат, па тогаш Јас ќе го одменам злото, што сум намислил да им го направам за нивните лоши работи.

⁴И речи им — вака вели Господ: ако не Ме послушате, и не одите по Мојот закон, што ви го дадов,

⁵и не ги примате зборовите на Моите слуги, пророците, кои ги праќам при вас, а ги праќам од рано утро, и кои вие не ги слушате —

⁶тогаш со овој дом ќе го направам исто она, што со Силом, и овој град ќе го предадам на проклетство на сите земни народи.

⁷Свештениците и пророците и сиот народ го слушаа Јеремија, кога ги зборуваше овие зборови во домот Господен.

⁸А кога Јеремија кажа сѐ, што му беше заповедал Господ да му каже на сиот народ, тогаш свештениците и пророците и сиот народ го фатија и рекоа: »заслужуваш смрт,

⁹оти пророкуваш во името на Господа и велиш — овој дом ќе стане како Силом, и овој град ќе запустее и ќе остане без жители?« И сиот народ се собра околу Јеремија во домот Господен.

¹⁰Кога го чуја тоа кнезовите јудејски, дојдоа од царскиот дом, во домот Господен и седнаа пред влезот на новите порти на домот Господен.

¹¹Тогаш свештениците и пророците вака им рекоа на кнезовите и на сиот народ: »Овој човек заслужува смрт, затоа што пророкува против овој град; а тоа го чувте со ушите свои!«

¹²И им рече Јеремија на сите кнезови и на сиот народ: »Господ ме прати да пророкувам против овој дом и против овој град со сите зборови, што ги чувте;

¹³па така, исправете ги патиштата и делата ваши и послушајте го гласот на Господа, вашиот Бог, и Господ ќе го одмени злото, што го изрече против вас.

¹⁴А што се однесува до мене, еве, јас сум во ваши раце; правете со мене, што сметате дека е добро и право;

¹⁵само знајте добро, дека, ако ме убиете, ќе земете невина крв врз себе и врз овој град и врз жителите негови, оти навистина, Господ ме прати при вас да ви ги кажам на ушите ваши сите овие зборови.«

¹⁶Тогаш кнезовите и сиот народ им рекоа на свештениците и на пророците — овој човек не потпаѓа под смртна пресуда, затоа што тој ни зборува во името на Господа, нашиот Бог.

¹⁷И некои од старешините месни станаа и му зборуваа на целото собрание:

¹⁸»Михеј од Мораст пророкуваше во деновите на јудејскиот цар Езекија и му зборуваше на сиот јудејски народ: вака вели Господ Саваот — Сион ќе биде разорен како нива, и Ерусалим ќе стане куп урнатини, и гората на овој дом како шумовит рид.

¹⁹Па зар го уби заради тоа јудејскиот цар Езекиј и цела Јудеја? Па зар не се уплаши тој од Господа и зар не го замоли Господа, и Господ го одмени злото, што беше го изрекол против нив; а треба ли ние сега да навлечеме такво големо зло врз душите свои?

²⁰Пророкуваше во името на Господа и некој Уриј, синот на Семаја, од Киријат — Јарим, и тој пророкуваше против овој град и против оваа земја со истите зборови, како сега Јеремиј.

²¹Кога ги чу тие зборови, царот Јоаким и сите негови големодостојници, и сите кнезови, побара да го убијат. А кога го разбра тоа, Уриј се уплаши и побегна, па отиде во Египет.

²²Но царот Јоаким испрати по него луѓе и во Египет: Елнатана, синот Ахборов, и неко други со него.

²³И го изведоа Урија од Египет, па го доведоа при царот Јоакима, и тој го уби со меч, а трупот негов го фрли кај гробиштата на обичните луѓе.«

²⁴Но раката на Ахикама, синот Сафанов, беше покрај Јеремија и не го даде во рацете на народот, за да биде убиен.