Read Lamkang Јеремија 30 Bible Online

Јеремија 30 - Lamkang bible

Јеремија 30

¹Слово Господово што дојде до Јеремија —

²вака вели Господ, Бог Израилев: запиши ги во книга сите зборови, што ти ги кажав.

³Оти, еве, идат дни, вели Господ, кога ќе го вратам од ропство Мојот народ, Израилот и Јуда, вели Господ; и повторно ќе ги доведам во земјата, која им ја дадов на татковците нивни, и тие ќе ја владеат.

⁴А еве ги зборовите, што ги изрече Господ за Израилот и за Јуда.

⁵Вака вели Господ: глас од смут и ужас слушаме ние, а не мир.

⁶Прашајте и размислете: раѓа ли маж? А зошто гледам при секој човек рацете да му се на бедрата како при жена, кога раѓа, и лицата на сите да им се бледи?

⁷О, тешко, голем е оној ден, нема сличен на него; тоа е мачно време за Јакова, но тој ќе биде избавен од него.

⁸И во оној ден, вели Господ Саваот, ќе го здробам јаремот негов, што му е околу вратот, и твоите окови ќе ги раскинам; па повеќе нема да служи на туѓинци,

⁹туку ќе Му служите на својот Господ Бог и на царот свој Давида, кого што ќе им го издигнам.

¹⁰И ти, слуго мој Јакове, не бој се, вели Господ, и не плаши се, Израилу, оти еве, Јас ќе те избавам тебе од земјата далечна и племето твое — од земјата на ропството; па ќе се врати Јаков и ќе живее спокојно и мирно и нема никој да го заплашува,

¹¹оти Јас сум со тебе, вели Господ, за да те избавувам: Јас наполно ќе ги истребам сите народи, меѓу кои те прогонив, но тебе нема да те истребам; ќе те казнам по мерка, но неказнет нема да те оставам.

¹²Оти така вели Господ: твојата рана не е излечива, болката ти е жестока;

¹³никој не се грижи за твоето дело, за да ти ја излекува раната твоја; за тебе лек нема;

¹⁴сите пријатели твои те заборавија, не те бараат, бидејќи Јас те удрив со непријателски удари, со жестока казна за многуте твои беззаконија, бидејќи гревовите твои се намножија.

¹⁵Зошто викаш поради раните свои, од лутина на твојата болест? За многуте твои беззаконија ти го направив тоа, оти гревовите твои се намножија.

¹⁶Но сите, што те голтаат, ќе бидат проголтани; и сите твои непријатели — ќе појдат во ропство, и твоите опустошители ќе бидат опустошени, и сите твои грабачи ќе ги предадам на грабеж.

¹⁷Ќе ги обложам и ќе ги излекувам твоите рани, вели Господ. Тебе те нарекуваа отфрлен, велејќи: »еве го Сион, за кого никој не прашува.«

¹⁸Така вели Господ: еве, ќе ги вратам заробените од шаторите на Јакова и ќе се смилувам на нивните живеалишта, и градот пак ќе биде изграден на својот рид, а и храмот ќе биде обновен, како што си беше.

¹⁹И ќе се крене од нив благодарност и глас на весели луѓе; и Јас ќе ги размножам, и нема да се намалуваат, па ќе ги прославам, и нема да бидат понизени.

²⁰И синовите негови ќе бидат како порано, и собранието негово ќе стои пред Мене, а ќе ги казнам сите негови насилници.

²¹И ќе излезе од него водач, и владетел негов ќе произлезе од него; и Јас ќе го привлечам, па ќе доје при Мене; оти кој е тој што сам од себе пристапува до Мене? — вели Господ.

²²И вие ќе бидете Мој народ, а Јас ќе ви бидам Бог.

²³Еве, виорот на јароста од Господа доаѓа, виор страшен; ќе падне врз главите на безбожниците.

²⁴Пламениот гнев на Господа нема да отстапи, сѐ додека не ја изврши и не ја исполни замислата на срцето Свое. Во последните дни ќе го разберете тоа.