Read Lamkang Јеремија 9 Bible Online

Јеремија 9 - Lamkang bible

Јеремија 9

¹О, кој ќе даде на главата моја вода и на очите мои — извор на солзи? Јас бев плачел ден и ноќ за убиените на ќерката на мојот народ.

²О, кој би ми дал во пустињата последен престој! Би го оставил мојот народ и би избегал од нив: зашто сите тие се прељубодејци, собир на престапници.

³Како лак го запнуваат јазикот свој за лаги, со неправда се засилуваат на земјата; зашто минуваат од едно зло на друго и Мене не Ме познаваат, вели Господ.

⁴Пазете се секој од пријателот свој, и не се доверувајте никому од браќата свои; зашто секој брат му става сопка на другиот, и секој пријател разнесува клевета.

⁵Секој го лаже пријателот свој, и вистина не говорат: го научија јазикот свој да говори лага, се трудат да прават зло.

⁶Ти живееш меѓу измами, па поради измама тие откажуваат дека Ме познаваат, вели Господ.

⁷Затоа вака вели Господ Саваот: ете, ќе ги растопам и ќе ги испитам; зашто, како инаку да постапам со ќерката на Мојот народ?

⁸Јазикот нивни — стрела смртоносна, говори подмолно; со устата кон ближниот зборуваат пријателски, а во срцето свое му кројат примки.

⁹Зар нема да ги посетам, вели Господ? Нема ли да се одмазди душата Моја на таков народ, како овој?

¹⁰На горите ќе кренам плач и пискот, и по пасиштата во степите — ридание, зашто тие се изгорени, така што преку нив никој не минува, ниту се слуша блеење на стада: и птиците небески и добитокот — сѐ се распрснало и избегало.

¹¹И ќе го претворам Ерусалим во купишта камења, живеалиште на змии, и градовите на Јудеја ќе ги направам пустиња, без жители.

¹²Има ли таков мудрец, што ќе го разбере ова? И оној, кон кого говори устата Господова — да објасни, зошто загина земјата и изгоре како пустиња, така што никој не минува низ неа?

¹³И рече Господ — поради тоа што го оставија Мојот закон, што го бев определил за нив, не го слушаа гласот Мој и не постапија според него,

¹⁴туку одеа според тврдокорноста на срцето свое и по Вааловци, како што ги научија татковците нивни.

¹⁵Заради тоа вака вели Господ Саваот, Израилевиот Бог: еве, ќе ги нахранам тие луѓе со пелин, ќе ги напојам со вода и жолчка.

¹⁶и ќе ги растурам меѓу народи, што не ги познаваа ни тие ни татковците нивни, и ќе испратам по нив меч, сѐ додека ги истреби.

¹⁷Така вели Господ Саваот: побарајте и повикајте да дојдат тажачки; испратете да дојдат вешти жени за таа работа.

¹⁸Нека побрзаат и да заплачат заради нас, та од очите наши да се лејат солзи и од клепките наши вода да тече.

¹⁹Затоа што глас од плач се слуша од кај Сион: »Како нѐ ограбија, лошо сме посрамени, бидејќи ја оставаме земјата — ни ги разрушија куќите.«

²⁰Па така, слушајте го, жени, словото од Господа и да внимава увото ваше на словото од устата Негова; и учете ги ќерките свои на плач, и една со друга — на тажни песни.

²¹Бидејќи смртта влегува преку прозорците наши, се впушта во куќите наши, за да ги истреби децата од улиците и младешта од плоштадите.

²²Речи: така вели Господ — и ќе бидат фрлени труповите на луѓето како ѓубре в поле и како снопја зад жетвари, и не ќе има кој да ги собере.

²³Така вели Господ: мудриот да не се фали со мудроста своја, силниот да не се фали со силата своја, богатиот да не се фали со богатството свое.

²⁴А кој се фали, нека се фали со тоа, дека Ме разбира Мене и дека знае оти Јас сум Господ, Кој покажува милост, суд и правда на земјата; оти само тоа е благоугодно пред Мене, вели Господ.

²⁵Ете идат денови, вели Господ, кога ќе ги посетам сите обрезани и необрезани:

²⁶Египет и Јудеја, Едома и синовите Амонови, Моава и сите кои се стрижат од страна, што живеат во пустињата; оти сите тие народи се необрезани, а сиот дом Израилев има срце необрезано.