Read Lamkang Ппророк Језекиил 16 Bible Online

Ппророк Језекиил 16 - Lamkang bible

Ппророк Језекиил 16

²»Сине човечки, кажи му ги на Ерусалим неговите гадотии.

³И речи — вака ѝ вели Господ Бог на ќерката ерусалимска: — твојот корен и твојата татковина е во Хананската земја; татко твој е Амореец, а мајка ти е Хетејка;

⁴при твоето раѓање — во денот кога се роди — папокот ти го пресекоа, со вода не те измија заради очистување, со сол не те посолија и во пелени не те повија.

⁵Ничие око не се смили на тебе та од милост кон тебе да ти направат нешто од тоа; но те фрлија во полето од презир кон твојот живот во денот на твоето раѓање.

⁶Минував јас покрај тебе и те видов оставена како преташ во крвта твоја, па ти реков: ‚живеј во крвта своја!‘ Така ти реков и пак Јас — ‚во крвта своја живеј!‘

⁷Се размножи како растенијата во полето; порасна, стана голема и се здоби со голема убавина: твоите гради се надигаа, а и косата ти порасна; но беше гола и непокриена.

⁸Минував покрај тебе и те видов, а тоа беше времето твое, време за љубов; ги прострев полите од облеката Своја врз тебе и ја покрив голотијата твоја; па ти се заколнав и стапив во сојуз со тебе, вели Господ Бог — и ти стана Моја.

⁹Те измив со вода, и ја измив од тебе крвта и те помазав со елеј.

¹⁰Ти облеков везена облека и ти обув црвени сандали, те опашав со висон и те покрив со свилен превез.

¹¹Те искитив со накити и ти ставив гривни на рацете, а околу вратот — веришка.

¹²Ти ставив и прстен на носот, обетки на ушите, а на главата твоја — прекрасен венец.

¹³И така, ти беше украсена со злато и сребро, а облеката ти беше висон, свила и везена ткаенина; се хранеше со леб од најдобро пченично брашно, со мед и елеј, и беше многу убава, па достигна царско велелепие.

¹⁴И се разнесе славата твоја меѓу народите поради твојата убавина, зашто таа претставуваше полно совршенство при великолепниот накит, со кој ти искитив — вели Господ Бог.

¹⁵Но ти се надеваше на убавината своја, и користејќи се со славата своја, почна да блудствуваш, и живееше блудно со секој минувач, подавајќи му се.

¹⁶Па зеде од облеката своја и си направи шарени идолчиња, па блудствуваше на нив како ништо да не било, и нема да биде.

¹⁷И ги зеде своите накити од моето злато и од моето сребро, што ти ги дадов Јас и си направи од нив машки ликови и блудстуваше со нив.

¹⁸Па ги зеде своите везени облеки, ги облече во нив, и стави пред нив Мој елеј, Мој темјан,

¹⁹и Мој леб, што ти го давав; пченичното брашно, елејот и медот, со кое те хранев, ти ги ставаше пред нив со благопријатен мирис; и тоа стана така — вели Господ Бог.

²⁰И ги зеде сивновите свои и ќерките свои, што Ми ги роди, па ги принесуваше преку оган како жртва, за да бидат проголтани. Зар малку блудствуваше?

²¹Но ти и синовите Мои ги колеше и ги давеше, принесувајќи ги преку оган.

²²И при сите твои гадотии и твоите блудства, ти не се сети за деновите на својата младост, кога беше гола и непокриена и фрлена за да бидеш измачувана во крвта своја.

²³И по сите тие злодејанија — ‚тешко, тешко тебе‘, вели Господ Бог.

²⁴Ти изгради куќи за блуд, на својата улица ги направи.

²⁵Во почетокот на секоја улица направи куќи за блуд, ја срамотеше твојата убавина, ги рашируваше нозете твои за секој минувач, го преумножи твоето блудствување.

²⁶Блудствуваше со египетските синови — со своите соседи, луѓе силни, го умножуваше блудството и ме разгневуваше.

²⁷И ете, Јас ја протегнав раката Своја против тебе и го намалив дарот, за тебе, па те препуштив на произвол пред ќерките филистејски, кои те мразеа и се засрамија од твоето лошо поведение.

²⁸Ти блудствуваше со синовите на Асура не се насити што блудствуваше со нив, но со тоа не се задоволи;

²⁹Ти ги умножи блудствата свои во земјата Хананска до Халдеја, но и со тоа не се задоволи.

³⁰Колку ли треба да е истоштено срцето твое — вели Господ Бог — кога сето тоа го вршеше како необуздана блудница!

³¹Кога градеше куќи за блуд во почетокот на секоја улица и си правеше шарени возвишенија на секој крстопат, ти не гледаше како блудница, зашто ги отфрлуваше подароците,

³²но беше како неверна жена, која место својот маж, прибира туѓи мажи.

³³На секоја блудница ѝ даваат подароци, а ти самата даваше подароци на сите свои миленици и ги поткупуваше, за да доаѓаат при тебе од сите страни и да блудстуваат со тебе.

³⁴При твоето блудствување стануваше обратно од она, што станува кај жените; за да доаѓаат при тебе, а ти даваше подароци, тебе не ти даваа подароци; и затоа ти постапуваше обратно од другите.

³⁵Па поради тоа чуј го, блуднице, словото Господово.

³⁶Вака вели Господ Бог: заради тоа што ги распилуваше парите свои и при блудствувањето твое беше разоткривана голотијата твоја пред очите на твоите миленици и пред сите твои одвратни идоли, а за крвта на твоите синови, што им ги даваше ти —

³⁷затоа, еве, Јас ќе ги соберам сите твои миленици, со кои се насладуваше и кои ти ги љубеше, како и оние што ги мразеше, и ќе ги соберам одред сите против тебе и ќе ја разоткријам пред нив голотијата твоја, и ќе го видат сиот срам твој.

³⁸Јас ќе ти судам, како што им се суди на прељубнички и на оние, кои пролеваат крв — и ќе те предадам на крвава јарост и ревност;

³⁹ќе те прададам во рацете нивни и тие ќе ги разрушат блудилиштата твои и ќе ги расфрлаат, ќе ги соблечат облеките твои од тебе, ќе ги земат накитите твои и ќе те остават гола и непокриена.

⁴⁰Ќе свикаат против тебе собрание, ќе те убијат со камења и ќе те расечат со мечеви свои.

⁴¹Со оган ќе ги изгорат твоите куќи и ќе извршат над тебе суд пред очите на многу жени; и ќе стават крај на твоето блудство, и повеќе нема да даваш подароци.

⁴²Ќе го смирам над тебе Својот гнев, и ќе отстапи од тебе Моето негодување, ќе се успокојам и нема повеќе да се гневам.

⁴³Затоа што не се сети на деновите од младоста своја и што со сето тоа Ме дразнеше, еве, и Јас ќе го свртам поведението твое врз главата твоја, вели Господ Бог, за да не се предаваш повеќе на разврат по сите твои гадотии.

⁴⁴Еве, секој што зборува во раскази, може да каже за тебе: ‚каква е мајката, таква е и ќерката‘.

⁴⁵Ти си ќерка како мајката твоја, која го оставила мажот свој и децата свои, и ти си сестра како сестрите нејзини, што ги оставиле мажите свои. Вашата мајка е Хетејка, а таткото ваш беше Амореец.

⁴⁶Твојата поголема сестра е Самарија, која со ќерките свои живееше лево од тебе, и помалата сестра твоја, што живееше десно од тебе е Содом со ќерките свои.

⁴⁷Но ти и по нивните патишта не одеше и по нивните гадотии не постапуваше. Тоа беше малку: ти постапуваше поразвратно од нив во сите твои патишта.

⁴⁸Жив да сум, вели Господ Бог: дури е Содом, сестрата твоја и ќерките нејзини не го вршеа она што го правеше ти и твоите ќерки.

⁴⁹Ете во каква состојба е беззаконието на сестра ти Содом и на ќеките нејзини: во гордост, во презаситеност, во празнина, и раката нејзина не помагаше силно човек во беда.

⁵⁰И се погодија тие, па вршеа гадотии пред лицето Мое, и, откако го видов тоа, Јас ги отфрлив.

⁵¹Самарија и половината од гревовите твои не направи; ти ги надмина со твоите гадотии, и преку твоите нечистотии, што ги изврши, сестрите твои се покажаа поисправни од тебе.

⁵²Носи го поради тоа срамот свој и ти, што ги осудуваше сестрите свои; според гревовите, со кои се покажа полоша од нив, тие се поисправни од тебе. Зацрвени се тогаш од срамот и ти, и носи си го срамот, што така ги оправда сестрите свои.

⁵³Но јас ќе ги вратам нивните заробеници, заробениците на Содом и на ќерките нејзини, заробениците на Самарија и на ќерките нејзини, како и твоите во плен одведени меѓу нив,

⁵⁴за да го носиш срамот свој и да се срамуваш од сето ова, што го правеше, откако ќе им бидеш утеха.

⁵⁵И сестрите твои, Содом и ќерките нејзини, ќе се вратат во поранешна состојба; исто така Самарија и ќерките нејзини ќе се вратат во поранешна состојба; а и ти и твоите ќерки ќе се вратите во поранешната состојба.

⁵⁶За сестра ти Содом и помен немаше во устата своја во деновите на твојата гордост,

⁵⁷додека уште не беше откриено твоето бесчестие, како во времето, кога беше посрамена од сириските ќерки и од сите, што ја опкружуваа, од филистејските ќерки кои одреда гледаа на тебе со презир.

⁵⁸Поради твојот разврат и поради твоите гадотии ти трпиш,« — вели Господ.

⁵⁹Оти така вели Господ: »Јас ќе постапам со тебе, како што постапи ти, кога ја презре клетвата, нарушувајќи го сојузот.

⁶⁰Но Јас ќе се сетам на Мојот сојуз со тебе во деновите на твојата младост и ќе востановам со тебе вечен сојуз.

⁶¹А и ти ќе се сетиш за твоите патишта, и ќе ти биде срам, кога ќе почнеш да ги примаш сестрите свои, поголемите од тебе, како и помалите од тебе, и кога почнав да ти ги давам за ќерки, но не по твојот завет.

⁶²Јас ќе го востановам Мојот сојуз со тебе, и ти ќе познаеш, дека Јас сум Господ,

⁶³за да помниш и да се срамуваш, и во иднина да не можеш од срам да ја отвориш устата, кога ќе ти простамсѐ, што го правеше ти« — вели Господ Бог.