Read Lamkang Ппророк Језекиил 28 Bible Online

Ппророк Језекиил 28 - Lamkang bible

Ппророк Језекиил 28

¹И би слово Господово до мене:

²»Сине човечки, кажи му на началникот на Тир — вака вели Господ Бог: затоа што го издигна срцето свое и велиш: ‚Јас сум бог, седам на божји стол, во срцето на морињата‘, и бидејќи човек си, а не бог, го заменуваш твојот ум со умот на Бога,

³ете, како да си помудар од Даниила; и нема тајна, сокриена од тебе;

⁴со мудроста своја и со разумот свој ти се здоби со богатство и во своите ризници собра злато и сребро;

⁵со големата мудрост своја преку трговијата своја ти го зголеми богатството свое,

⁶затоа, вака вели Господ Бог: — Бидејќи го изедначуваш твојот ум со умот на Бога,

⁷еве, Јас ќе доведам против тебе другоземци, највешти меѓу народите, и тие ќе ги извадат своите мечеви против убавината на твојата мудрост и ќе го помрачат твојот блесок;

⁸тие ќе те турнат во гроб и ќе умреш во срцето на морињата, со смрт на убиени.

⁹Ќе речеш ли тогаш пред твојот убиец: ‚јас сум бог‘, кога во раката на оној, што ќе те убива, ти ќе бидеш човек, а не бог?

¹⁰Ти ќе умреш од раката на другоземци со смрт како необрезан; оти Јас го реков тоа«, така вели Господ.

¹¹И би слово Господово до мене:

¹²»Сине човечки, плачи за тирскиот цар и кажи му: — вака вели Господ Бог: ти си печат на совршенство, полнота на мудроста и венец на убавината.

¹³ти беше во Едем, во Божјата градина; твоите облеки беа украсени со секакви скапоцени камења: рубин, топаз, дијамант, хризолит, оникс, јаспис, сапфир, карбункул, смарагд и злато, сите вешто исткаени и нанижани на тебе, приготвени во денот кога беше создаден.

¹⁴Ти беше помазан херувим за да осенува, и Јас те поставив за тоа; ти беше светата Божја гора, одеше среде огнени камења.

¹⁵Ти беше совршен во патиштата свои, од денот кога беше создаден, сѐ додека не се најде во тебе беззаконие.

¹⁶Од твојата проширена трговија утробата твоја се исполни со неправда и ти згреши; и Јас те соборив како нечист од Божјата гора, те истерав тебе, херувиме, што осенуваше, среде огнени камења.

¹⁷Од убавината твоја се возгордеа срцето твое, поради богатството твое си ја загуби мудроста своја; затоа Јас ќе те соборам на земја, ќе те предадам на потсмев пред царевите.

¹⁸Со многуте гревови свои во неправедната твоја трговија ти ги оскверни твоите светилишта; и Јас ќе пуштам оган пред тебе, што ќе те проголта; и Јас ќе те претворам во пепел на земјата пред очите на сите, што ќе те видат.

¹⁹Сите, што те знаеја меѓу народите, ќе се зачудат за тебе, ти ќе станеш за ужас и нема да те има повеќе.«

²⁰И би слово Господово до мене:

²¹»Сине човечки, сврти го лицето свое кон Сидон, и пророкувај против него:

²²Ете Јас сум против тебе, Сидоне, и ќе се прославам во тебе и ќе познаат дека сум Јас Господ, кога ќе одржам суд над него и ја покажам во него Мојата светост.

²³И ќе пратам во него помор и крв на улиците негови и ќе паднат среде него убиени од меч, кој ќе ги нападне сите одреда и ќе познаат, дека Јас сум Господ.

²⁴И во иднина тој нема да биде бодлив трн за домот Израилев и причинител на болка трнлива, повеќе од сите соседи што му сакаат зло и ќе познаат, дека Јас сум Господ Бог.«

²⁵Така вели Господ Бог: кога ќе го соберам домот Израилев меѓу народите, кај кои се распрснал и ќе ја објавам кај нив светоста Своја пред очите на племињата и тие заживеат во земајта своја, која му ја дадов на Мојот слуга Јакова,

²⁶тогаш ќе живеат во неа безопасно и ќе си изградат куќи, ќе насадат лозја и ќе живеат во безопасност, зашто ќе извршам суд над сите наоколу што ги презираа. И тогаш ќе разберат дека Јас сум Господ Бог нивни.