Read Lamkang Ппророк Језекиил 30 Bible Online

Ппророк Језекиил 30 - Lamkang bible

Ппророк Језекиил 30

¹И би слово Господово до мене:

²»Сине човечки, изречи пророштво и кажи — вака вели Господ Бог: плачете, ете иде злочест ден.

³Зошто близок е денот, да, близок е денот Господен, денот мрачен; часот на народите иде.

⁴И ќе тргне меч против Египет и ужас ќе се распространи во Етиопја, кога поразените од Египет ќе паднат, кога ќе го земат богатството негово и кога основите негови ќе бидат разрушени.

⁵Етиопија, Либија, Лидија, сиот измешан народ и Хуб, како и синовите на заветната земја заедно со нив ќе паднат од меч.

⁶Така вели Господ Бог, ќе паднат потпорите на Египет и ќе падне гордоста на неговата моќ; од Мигдол до Сиена ќе паѓаат во него од меч, вели Господ Бог.

⁷И тој ќе се запусти меѓу опустошените земји и градовите негови ќе бидат меѓу опустошени градови.

⁸И ќе познаат, дека Јас сум Господ, кога ќе го пратам огнот врз Египет и сите негови сили ќе бидат скршени.

⁹Во оној ден, ќе тргнат од Мене известители со кораби за да ги уплашат безгрижните Етиопјани, и ќе се распространи меѓу нив ужас, како во денот на Египет; оти, ете, тој иде.

¹⁰Така вели Господ Бог: на египетскиот многуброен народ ќе му ставам крај преку раката од Навуходоносора, царот вавилонски.

¹¹Тој и народот негов со него, најжестоки меѓу народите, ќе бидат доведени за погибел на таа земја и ќе ги извадат мечевите свои против Египет и ќе ја наполнат земјата со убиени.

¹²Ќе ги пресушам реките и ќе ја предадам земјата во рацете на лошите и со раката на туѓоземци ќе ја опустошам земјата и сѐ што ја исполнува. Јас, Господ, го реков тоа.«

¹³Така вели Господ Бог: »Ќе ги истребам идолите и ќе ги уништам лажните богови во Мемфис и во земјата Египетска нема повеќе да има сопственик, и ќе пратам страв во земјата Египетска.

¹⁴Ќе го опустошам Патрос, ќе испратам оган, во Соан и ќе одржам суд над Но.

¹⁵Ќе ја излијам јароста Своја врз Син, египетската тврдина, и ќе го истребам многубројниот народ во Но.

¹⁶Ќе испратам оган врз Египет, ќе затрепери Син и Но ќе биде разрушен. А врз Мемфис ќе нападнат непријателите среде бел ден.

¹⁷Младите луѓе од Он и од Бубаст ќе паднат од меч, а другите ќе бидат одведени во ропство.

¹⁸И во Тафнис ќе се помрачи денот кога таму ќе го скршам јаремот египетски и ќе се прекрати во него неговата горда моќ. Облак ќе го покрие и ќерките негови во ропство ќе отидат.

¹⁹така ќе го пресудам Египет, па ќе познаат дека Јас сум Господ.«

²⁰Во единаесеттата година, во првиот месец, на седмиот ден од месецот, би слово Господово до мене:

²¹»Сине човечки, Јас веќе ја скршив мишката на Фараонот, египетскиот цар, и ете, таа уште не е преврзана, за да биде излекувана, и не е завиткана со лекарски преврски, од кои би добила сила, за да држи меч.

²²Затоа, вака вели Господ Бог: еве Јас сум против Фараонот, египетскиот цар и ќе ги скршам мишките негови, здравата и искршената, така што мечот ќе му падне од рацете негови.

²³Ќе ги растурам Египтјаните меѓу народите и ќе ги развеам по земјите.

²⁴А мишките на вавилонскиот цар ќе ги направам јаки, во раката негова ќе му дадам Свој меч; и мишките на Фараонот ќе ги скршам и тој изнаранет ќе офка силно пред него.

²⁵Ќе ги зацврстам мишките на вавилонскиот цар, а мишките на Фараонот ќе отпаднат; и ќе познаат, дека Јас сум Господ Бог, кога ќе му го дадам мечот Свој во раката на вавилонскиот цар, и тој ќе го потегне врз земјата Египетска.

²⁶Ќе ги растурам Египтјаните меѓу народите и ќе ги развеам по земјата, и тие тогаш ќе познаат, дека Јас сум Господ.«