Read Lamkang Ппророк Језекиил 31 Bible Online

Ппророк Језекиил 31 - Lamkang bible

Ппророк Језекиил 31

¹Во единаесеттата година, третиот месец, на првиот ден од месецот, би слово Господово до мене:

²»Сине човечки, кажи му на Фараонот, египетскиот цар и на народот негов — со кого се споредуваш ти во твоето величие?

³Ете, Асур беше кедар ливански со убави гранки, искитен и висок; врвот негов — меѓу густи облаци.

⁴Водите го правеа да расте, бездната го издигаше, реките го опкружуваа неговиот корен и тој ги ширеше потоците свои кон сите полски дрвја.

⁵Затоа височината негова ги надминуваше висините на сите полски дрвја; на него имаше многу гранки; ветките му се умножуваа и гранките стануваа долги од многу вода кога растеше.

⁶Во неговите гранки секакви небески прици си правеа гнезда, а под гранчињата негови се раѓаа мали од секаков вид полски ѕверови, додека под сенката негова живееја многубројни народи.

⁷Тој се разубавуваше со својот висок раст, со долгите гранки, затоа што коренот му се наоѓаше покрај големи води.

⁸Кедрите во Божјата градина не го засенуваа; кипарисите не се изедначуваа со неговите гранки, и јаворите не беа толку високи колку неговите врвови; ниедно дрво во Божјата градина не можеше да се споредува со него по убавината своја.

⁹Јас го украсив со многуте гранки, така што сите едемски дрвја во Божјата градина му завидуваа.«

¹⁰Затоа, така вели Господ Бог: »Бидејќи израсна висок и се издигна врвот негов меѓу дебелите гранки, и срцето му се возгордеа од неговата големина,

¹¹затоа јас го предадов во рацете на сопственикот на народите; тој постапи со него како што требаше да постапи; но поради неговото беззаконие Јас го отфрлив.

¹²И го исекоа туѓинците, најлути меѓу народите, па го соборија; гранките негови паѓаа по горите и по сите долини се кршеа неговите гранчиња по сите полиња, а од неговата сенка избегаа сите народи од земјата и го оставија.

¹³На неговото паднато стебло се сместија многу небески птици, а меѓу гранките — секакви полски животни.

¹⁴Тоа сѐ стана, за да не се гордеат со својот висок раст никакви дрвја покрај водите, да не ги издигаат врвовите свои до густите облаци и да не се допираат до него со нивната височина дрвја што пијат многу вода; оти сите тие ќе бидат предадени на смрт во пеколот заедно со синовите човечки, што порано слегнале во гроб.«

¹⁵Вака вели Господ Бог: »Во оној ден, кога тој слезе во гроб, Јас направив да жалат за него, ја затворив бездната поради него и ги запрев реките нејзини, ги задржав големите води и го нажалив за него Ливан, и сите полски дрвја тагуваа по него.

¹⁶Се затресоа од неговото паѓање. Јас ги доведов народите во трепет, кога го кутнаа во пеколот, при оние што порано слегнале во гроб, и се зарадуваа во адот сите дрвја едемски, одбраните и најдобрите на Ливан, сите што пијат вода;

¹⁷оти и тие слегоа со него во бездната при убиените со меч, како и неговите сојузници што живееја под сенката негова меѓу народите.

¹⁸Па така со кое ли од едемските дрвја се споредуваш ти по слава и величина? Но, сега заедно со едемските дрвја и ти ќе биде соборен во бездната, ќе лежиш со необрезаните, меѓу убиените од меч. Тоа Фараонот и сиот негов многуброен народ«, вели Господ Бог.