Read Lamkang Ппророк Језекиил 48 Bible Online

Ппророк Језекиил 48 - Lamkang bible

Ппророк Језекиил 48

¹А ова се имињата на колената. На север, по патот што води од Хетлон за Емат и Хацар Енон, на меѓата меѓу Дамаск и Емат, сето тоа од исток па сѐ до морето е еден дел за Дан.

²А од границата на Дан, од север па до запад, тоа е еден дел за Асира.

³Од границата, пак, на Асира, од источниот крај па до западниот, тоа е дел еден за Нефталима.

⁴До границата на Нефталима, од источниот крај па сѐ до западниот, тоа е еден дел за Манасија.

⁵До границата на Манасија, од исток до запад, тоа е еден дел за Ефрема.

⁶До границата на Ефрема, од источниот крај па сѐ до западниот, тоа е еден дел за Рувима.

⁷До границата на Рувима, од исток до запад, тоа е еден дел за Јуда.

⁸А до границата на Јуда, од исток до запад, е свештениот дел, широк дваесет и пет илјади трски и долг колку што се и другите делови, од исток па сѐ до запад? Во средината негова се наоѓа светилиштето.

⁹Делот што е посветен за Господа ќе биде долг дваесет и пет илјади трски, а широк десет илјади.

¹⁰И тој свештен дел треба да им припаѓа на свештениците, кој е од северната страна долг дваесет и пет илјади лакти, а од кај морето — широк десет илјади, и од кај исток — широк десет илјади, а од кај југ долг ќе биде дваесет и пет илјади, додека спроти него ќе биде поставено светилиштето на Господа.

¹¹Дајте им го тоа на свештениците од синовите на Садока, што Ми стоеја на стража, кога отстапуваа синовите Израилеви, но тие не отстапија од Мене, како што отстапија другите левити.

¹²Ним ќе им припадне тој дел од свештената земја, Свјатаја Свјатих, во пределот на левитите.

¹³И левитите ќе добијат во свештеничкиот дел дваесет и пет илјади трски надолж и десет илјади нашир; целата должина ќе е дваесет и пет илјади трски, и ширина десет илјади.

¹⁴Од тој дел тие не можат ни да продаваат, ниту да сменуваат; и првините од земјата не можат да ги пренесуваат на други, зашто тоа е светиња Господова.

¹⁵А другите пет илјади лакти во ширина од дваесет и пет илјади и во должина — пет илјади, ќе се определат за општа употреба на градот, за населби и за предградија; градот ќе биде во средината.

¹⁶А еве ги мерките — од северната страна четири илјади и петстотини трски, од јужната четири илјади и петстотини, од источната четири илјади и петстотини и од западната страна — четири илјади и петстотини.

¹⁷Предградието, пак, на градот ќе биде двесте и педесет лакти од север, двесте и педесет од исток, двесте и педесет од југ и двесте и педесет од запад.

¹⁸А она што ќе преостане од должината спроти свештениот дел — десет илјади спрема исток и десет илјади спрема запад, спроти свештениот дел, ќе биде земја, чии производи ќе служат за исхрана на работниците во градот.

¹⁹Во градот ќе можат да работат работници од сите Израилеви колена.

²⁰Одвоениот дел од дваесет и пет илјади лакти во должина и дваесет илјади во ширина, четириаголен, определете го како свештен дел, вклучувајќи ги во него и владенијата на градот.

²¹А сѐ што ќе остане, да биде за кнезот. Како откај свештениот дел, така исто и откај владенијата на градот, спроти дваесет и петте илјади трски до источната граница, на делот, и на запад спроти дваесет и петте илјади лакти на западната граница, сразмерно со сите делови е делот на кнезот, така што свештениот дел и светилиштето да бидат во средината негова.

²²А она што ќе остане од левитските владенија и од владенијата на градот во средината, ќе му припадне исто така на кнезот: меѓу границата на Јуда и меѓу границата на Венијамина.

²³Остатокот, пак, од колената, од источниот крај до западниот — е еден дел за Венијамина.

²⁴До границата на Венијамина, од исток до запад, ќе биде еден дел за Симеона.

²⁵До границата на Симеона, од исток па до запад, тоа ќе биде еден дел за Исахара.

²⁶До границата на Исахара, од источниот крај па до западниот, ќе е еден дел за Завулона.

²⁷До границата на Завулона, од исток па до запад, еден дел за Гада.

²⁸А до границата на Гада, од јужната страна, се протега јужниот крај од Тамара до водите на Мерива во Кадис, по должината на потокот сѐ до големото море.

²⁹Ете, тоа е земјата што со жреб ќе ја разделите меѓу Израилевите колена, и тоа се деловите, вели Господ Бог.

³⁰А ова се излезите на градот: од северната страна — четири илјади и петстотини мерки,

³¹и портите на градот се именувани со имињата на колената Израилеви: од северната страна три порти — Рувимова, Јудина, Левиева.

³²И од источната страна — четири илјади и петстотини мерки, со три порти — Јосифова, Венијаминова, Данова.

³³И од јужната страна — четири илјади и петстотини мерки, со три порти: Симеонова, Исахарова и Завулонова.

³⁴Од страната на морето, пак, — четири илјади и петстотини мерки, и три порти: Гадова, Асирова и Нефталимова.

³⁵А мерката наоколу ќе изнесува осумнаесет илјади. И градот од тој ден ќе се именува: »Господ е таму«.