Read Lamkang Ппророк Језекиил 7 Bible Online

Ппророк Језекиил 7 - Lamkang bible

Ппророк Језекиил 7

¹И би слово Господово до мене:

²»Ти, сине човечки, кажи — така вели Господ Бог — свршеток на земјата Израилева; дојде свршетокот на сите четири краишта земни.

³Ете, дојде свршетокот за тебе; и ќе го пратам врз тебе гневот Свој, и ќе ти судам според патиштата твои, и ќе ги натоварам врз тебе сите гадотии.

⁴И окото Мое нема да те зажали и нема да се смилувам, но ќе ти платам според твоите патишта, гадотиите твои ќе бидат со тебе и ќе разберете дека Јас сум Господ.

⁵Така вели Господ Бог: беда единствена, ете иде бедата.

⁶Свршетокот дојде, дојде свршетокот, се крена против тебе: ете дојде.

⁷Дојде напаста до тебе, жителу на овој крај, иде време, се приближува денот на смутот, а не на весели повици по планините.

⁸Ете, наскоро ќе ја излеам врз тебе јароста Своја и ќе го завршам гневот Свој врз тебе, ќе ти судам според твоите патишта и ќе ги натоварам врз тебе сите твои гадотии.

⁹И окото Мое нема да те пожали, и нема да се смилува. Според твоите патишта ќе ти отплатам, и твоите гадотии ќе бидат со тебе; и ќе узнаете, дека Јас сум Господ, Кој казнува.

¹⁰Ете го денот, еве дојде, настапи напаста, процути жезалот, гордоста пупи.

¹¹Силата станува против жезалот на беззаконието: ништо нема да остане од нив, — ни од богатството нивно, ниту од шумата нивна, ниту, пак, од раскошот нивни.

¹²Дојде времето, настапува денот: купувачу, не радувај се, продавачу не плачи, зашто гневот е врз нив сите.

¹³Оти, кој продал, нема да се врати при продаденото, макар да останал жив; бидејќи пророчкото видение за целото нивно множество нема да се одмени, и никој со беззаконието свое нма да го зацврсти животот свој.

¹⁴Трубат со трубата и сѐ се готви, но никој не оди во војна; оти Мојот гнев е врз сето нивно множество.

¹⁵Надвор од куќата — меч, а во куќата — помор и глад. Кој се наоѓа во полето, од меч ќе умре, а кој е во градот, него гладот и поморот ќе го проголта.

¹⁶А спасените од тоа ќе избегаат и ќе бидат во планините како гулаби од долина; сите тие ќе стенкаат, секој за своето беззаконие.

¹⁷На сите рацете ќе им опаднат, и на сите колената ќе им затреперат како вода.

¹⁸Тогаш ќе се опашат во вреќишта и трепет ќе ги опфати; и лицето на сите ќе ги покрие срам и на главите — нивни ќе има ќелавост.

¹⁹Среброто ќе си го исфрлаат по улици и златото нема да го почитуваат. Среброто нивно и златото нивно нема да биде во сила да ги спаси во денот на Господовата јарост. Тие нема да ги наситат со нив душите свои, и нема да ги наполнат утробите свои бидејќи тоа беше причина за нивниот грев.

²⁰И со убавиот накит свој тие се гордееја и правеа уметнички творби за гадотиите свои со идоли; затоа ќе го направам нечисто за нив.

²¹И ќе го дадам како плен во рацете на туѓинци и на грешници земни, за да го разграбаат, и тие ќе се осквернат.

²²И ќе го одвратам од нив лицето Свое и ќе го осквернат Моето сокриено место; и ќе влезат таму грабители и ќе го осквернат.

²³Проготвив вериги, оти таа земја е полна со крвави злодејства, и градот е полн со насилие.

²⁴Јас ќе доведам најлоши народи и тие ќе ги завладеат домовите нивни. И ќе ставам крај на гордоста кај силните, и ќе бидат осквернети и светињите нивни.

²⁵Иде погибелта; ќе бараат мир и нема да го најдат.

²⁶Беда ќе следува по беда и вест по вест; и ќе бараат од пророкот видение и нема да има наука кај свештениците и совет кај старците.

²⁷Царот ќе тажи, и кнезот ќе се облече во ужас, и рацете на народот во земјата ќе треперат. Ќе постапам со нив според нивните патишта, според нивниот суд ќе ги судам; и ќе узнаат, дека Јас сум Господ.«