Read Lamkang Осија 11 Bible Online

Осија 11 - Lamkang bible

Осија 11

¹Во рани зори ќе загине царот Израилев. Кога Израилот беше млад, Јас го сакав и од Египет го повикав синот Свој.

²Ги повикуваа, но тие ги одбиваа, принесуваа жртви на Вааловци и им кадеа на идолите.

³Јас Самиот го учев Ефрема да оди, го носев на рацете Свои, а тие не сфаќаа дека со тоа ги лекував.

⁴Ги влечев со човечки врски, со врски на љубов, и Јас бев за нив како оној, што ја вади уздата од устата нивна, и кротко им подавав храна.

⁵Тој нема да се врати во Египет; Асур — ќе му биде цар, зашто тие не посакаа да се врати при Мене.

⁶И меч ќе падне врз нивниот град, ќе ги уништи неговите заштитници, и ќе ги проголта нивните намери.

⁷Народот Мој е упорен во отпаѓањето од Мене, макар и да беше навикнуван кон возвишено издигнување, тој сепак не се издигнува еднодушно.

⁸Како да постапам со тебе, Ефреме? Како да те предадам, Израиле? Ќе постапам со тебе како со Адама? Ќе ти направам како што му направив на Севоим? Се возбуди срцето Мое во Мене, затрепери утробата Моја од жалост.

⁹Нема да постапам според јароста на гневот Свој, и нема да го истребам Ефрема, оти Јас сум Бог, а не човек; кај тебе е Светиот; Јас нема да влезам во градот.

¹⁰По Господа тие ќе одат. Како лав ќе го издигне Он гласот Свој, ќе го пушти гласот Свој — и ќе побрзаат кон Него синовите од запад,

¹¹ќе полетаат од Египет како птици, и од Асирија — како гулаби, и ќе ги населам во домовите нивни, вели Господ.

¹²Ефрем Ме опкружил со лага, а домот Израилев со лукавство; но Јуда сѐ уште се држеше за Бога, и верен беше со светиите.