Read Lamkang Осија 4 Bible Online

Осија 4 - Lamkang bible

Осија 4

¹Чујте го словото Господово, синови Израилеви; зашто Господ ќе им суди на жителите од оваа земја, оти нема ни вистина, ни милосрдие, ниту знаење за Бога на земјата.

²Клетва и измама, убиство, кражби и прељубодејства многу се распространија, и крвта со крв се измешува.

³Затоа таа земја ќе се расплаче, и ќе се истоштат сите, што живеат на неа, заедно со полските животни и птиците небески; дури и рибите во морето ќе загинат.

⁴Но никој да не се препира и никој никого да не обвинува; и твојот народ е како оние што спорат со свештеникот.

⁵Ти ќе паднеш дење, и со тебе пророкот ќе падне ноќе, а Јас ќе ја погубам твојата мајка.

⁶Мојот народ се оприличил на тие што немаат знење, зашто ти си отфрлил знаење, и јас ќе те отфрлам од свештенодејството пред Себе; бидејќи го заборави законот на својот Бог, и Јас ќе ги заборавам децата твои.

⁷И колку повеќе се размножуваат, толку повеќе и грешат против Мене; затоа славата нивна ќе ја претворам во бесславие.

⁸Тие се хранат со гревовите на Мојот народ, и кон беззаконијата негови се стреми душата нивна.

⁹И што ќе стане со народот, тоа ќе се случи и со свештеникот; ќе го казнам според патиштата негови и ќе му платам според делата негови.

¹⁰Ќе јадат — и нема да се наситуваат; ќе блудствуваат и нема да се размножуваат, оти престанаа да Му служат на Господа.

¹¹Блудството, виното и пијалоците ги овладеале срцата нивни.

¹²Мојот народ го прашува дрвото, и неговиот жезал му дава одговор; зашто духот на блудството ги вовел во залуда, па блудствувајќи, тие отстапија од својот Бог.

¹³Принесуваат жртви по планинските врвови и по ридовите кадат под даб, топола и брест, оти тие имаат добри сенки; затоа ќерките ваши блудствуваат, а снаите ваши прељубодејствуваат.

¹⁴Нема да ги казнувам ќерките ваши кога блудствуваат, и снаите ваши кога прељубодејствуваат, оти вие самите сте блудници и со миленици принесувате жртви, а простиот народ гине.

¹⁵Ако ти, Израиле, блудствуваш, Јуда барем да не грешеше; и не одете во Галгал, не влегувајте во Бет-Авен и не колнете се со клетвата: жив е Господ!

¹⁶Израилот е упорен како упорна јуничка; па ќе ги пасе ли затоа Господ како јаганца на широка ливада?

¹⁷Ефрем се поврзал со идолите; остави го!

¹⁸Одвратно е пијанството нивно; наполно се предале на блудство; нивните кнезови сакаат сѐ што е срамно.

¹⁹Ветрот ќе ги притегне со крилјата свои, и тие ќе се засрамат од жртвите свои.