Read Lamkang Јоил 3 Bible Online

Јоил 3 - Lamkang bible

Јоил 3

¹Зашто, ете, во оние денови и во тоа исто време, кога ќе ги вратам плениците на Јуда и од Ерусалим,

²тогаш ќе ги соберам сите народи и ќе ги доведам во долината Јосафатова, и таму над нив ќе изречам суд за Мојот народ и за Моето наследство — Израилот, кого го растурија меѓу народите и земјата Моја ја разделија.

³За народот Мој фрлија жреб и даваа момче за блудница, и продаваа девојче за вино, па пиеја.

⁴Па што барате од Мене вие, Тире и Сидоне и сите краеви филистејски? Сакате ли да Ми отплатите или рака да Ми вратите? Но наскоро ќе ја свртам отплатата ваша врз вашите глави,

⁵бидејќи вие го зедовте среброто Мое и златото Мое и Моите највредни драгоцености и ги внесовте во безбожнички светилишта;

⁶а синовите на Јуда и на Ерусалим ги продавате на синовите елински, за да ги отстраните од нивните предели.

⁷Еве, Јас ќе ги кренам од она место, каде што ги продадовте, и ќе ја свртам вашата отплата врз главите ваши.

⁸И ќе ги предадам синовите ваши и ќерките ваши во рацете на синовите Јудини, и тие ќе ги предадат на Савејците, народ далечен. Така вели Господ Саваот.

⁹Кажете го ова меѓу народите, пригответе се за војна, кренете ги јунаците, нека дојдат и нека станат сите војници.

¹⁰Прековајте ги плуговите свои во мечеви, а срповите во копја; и слабиот нека вели: силен сум.

¹¹Побрзајте, вие народи, сите наоколу и соберете се. Господи, поведи ги јунаците Свои!

¹²Нека се кренат народите и нека слезат во долината Јосафатова; зашто таму ќе седнам Јас за да им судам на народите по ред.

¹³Мавнете со срповите, зашто зрело е житото; одете, слезете, зашто полна е кацата и бочвите се преполнети, оти злобата им е голема.

¹⁴Групи, групи во долината на судот! Оти близу е денот Господен во долината на судот.

¹⁵Сонцето и месечината ќе потемнат, и ѕвездите ќе го изгубат својот сјај.

¹⁶И ќе загрми Господ од Сион и ќе го испушти гласот Свој од Ерусалим: ќе затреперат небото и земјата; но Господ ќе му биде заштита на Својот народ и одбрана за синовите Израилеви.

¹⁷Тогаш ќе познаете дека Јас сум Господ, вашиот Бог, Кој живее на Сион, на Мојата света гора; и ќе стане Ерусалим светиња, и нема повеќе туѓинци да минуваат низ него.

¹⁸И, ете, во тој ден, во тој ден од горите ќе капе вино, а од ридовите ќе потече млеко, и сите долини јудејски ќе се преполнат со вода, а од домот Господен ќе се појави извор, и ќе ја напојува долината Ситим.

¹⁹Египет ќе стане пустиња и Едом ќе стане пустиња, бидејќи тие ги измачуваа синовите Јудини и проливаа невина крв во земјата нивна.

²⁰А Јуда ќе живее вечно, и Ерусалим — од род во род.

²¹Јас ќе ја измијам крвта нивна, која уште не сум ја измил, и Господ ќе живее на Сион.