Read Lamkang Амос 5 Bible Online

Амос 5 - Lamkang bible

Амос 5

¹Чујте го ова слово, со кое ќе кренам плач за вас, доме Израилев.

²Падна, нема повеќе да стане девицата Израилева! Фрлена е на земјата своја, и нема кој да ја крене.

³Оти вака вели Господ Бог: град, од кој излегуваат илјадници, ќе остане само со сто, а од кој излегуваат сто, ќе остане само со десет во домот Израилев.

⁴Оти така му вели Господ на домот Израилев: побарејте Ме и ќе бидете живи.

⁵Не барајте го Ветил, не одете во Галгал и не патувајте во Вирсавија, зашто сиот Галгал ќе појде во ропство, а Ветил ќе се претвори во ништо.

⁶Побарајте Го Господа, и ќе бидете живи, за да не се нафрли Он против домот Јосифов како оган, што ќе го проголта, и не ќе има кој да го гасне во Ветил.

⁷О, вие, што го превртувате правосудството во отров и правдата ја фрлате на земја!

⁸Кој го создал седмоѕвездието и Орион и ја претвора смртната сенка во јасно утро, а денот го прави темен како ноќ, ги извикува морските води и ги разлива по земјата? Господ е името Негово!

⁹Он го заштитува рушителот против силниот, и опустошителот влегува во тврдината.

¹⁰А тие го мразат оној, кој изобличува пред портите, и се гаснат од оној, кој кажува правда.

¹¹Па така, затоа што го измачувате сиромавиот и земате од него подароци во жито, вие ќе изградите домови од делкан камен, но нема да живеете во нив; ќе насадите убави лозја, само вино од нив нема да пиете.

¹²Зашто Јас знам колку се многубројни вашите престапи, и колку се тешки вашите гравови; вие сте му непријатели на праведникот, земате поткуп и ги извртувате делата на сиромасите во судот.

¹³Поради тоа разумниот човек молчи во тоа време, оти времето е лошо.

¹⁴Барајте добро, а не зло, за да останете живи — и тогаш Господ Бог Саваот ќе биде со вас, како што велите вие.

¹⁵Мразете го злото, сакајте го доброто и поставете правосудство пред портите; можеби, Господ Бог Саваот, ќе се смилува на остатокот Јосифов.

¹⁶Затоа вака вели Господ Бог Саваот, Седржителот: по сите ваши улици ќе има плач, и по сите ваши патишта ќе викаат: Оф, оф! И ќе повикаат земјоделец да жали и искусни за жални песни, да плачат;

¹⁷и по сите лозја ќе има плач, оти Јас минам меѓу тебе, вели Господ.

¹⁸Тешко им на оние, кои го бараат денот Господен! Зашто ви е тој ден Господен? Тој е темнина, а не светлина.

¹⁹Тоа е исто како кога некој ако побегне од лав, па ќе го сретне мечка, или ако дојде дома и се потпре со раката на ѕид, па го касне змија.

²⁰Зар денот Господен не е мрак, туку светлина? Тој е мрак, и во него нема болскот.

²¹Ги мразам и ги отфрлувам празниците ваши и не ги помирисувам жртвите ваши во времето на вашите прослави во собранијата.

²²Ако ми принесете сепаленица и лебен принос, нема да ги примам и нема да погледнам милостиво на благодарствената жртва од вашите угоени телиња.

²³Отстрани го од мене шумот на твоите песни, зашто звуците на твојата гусла нема да ги слушам.

²⁴Правосудството нека тече како вода, и правдата — како силен поток.

²⁵Зар не ми принесувавте жртви и дарови во лебови во пустињата во текот на четириесетте години, доме Израилев?

²⁶Вие ја носевте скинијата Молохова и ѕвездата на вашиот бог Ремфан, ликови што ги направивте за себе.

²⁷Затоа Јас ќе ве преселам зад Дамаск, вели Господ; Бог Саваот е името Негово.