Read Lamkang Јона 3 Bible Online

Јона 3 - Lamkang bible

Јона 3

¹И повторно дојде словото Господово до Јона, велејќи му:

²»Стани и појди во градот Ниневија, големиот град и проповедај му го она што ќе ти кажам.«

³Стана Јона и отиде во Ниневија по заповед на Господа; а Ниневија беше многу голем град: три дена одење.

⁴И Јона почна да оди по градот, колку што можеше да се изоди за еден ден, и проповедаше, велејќи: »Уште четириесет дена и Ниневија ќе биде разурната!«

⁵И поверуваа ниневијците во Бога, прогласија пост и се облекоа во вреќи, мало и големо.

⁶Таа проповед дојде и до царот на Ниневија, и тој стана од престолот свој, ја соблече царската облека, се облече во вреќиште и седна во пепел,

⁷па заповеда да се прогласи и да се каже во Ниневија од името на царот и од неговите големци — ни луѓето, ни добитокот, ни воловите, ниту овците да не јадат ништо и да не одат на пасење и да не пијат;

⁸и луѓето и добитокот да бидат покриени со вреќишта и силно да извикуваат кон Бога: секој да се откаже од својот лош пат и од насилството на рацете свои.

⁹Кој знае — можеби Бог ќе се смилостиви и ќе го отфрли од нас својот разгорен гнев, и така да не загинеме.

¹⁰И ги виде Бог нивните дела, оти тие се одвратија од својот лош пат, па се сожали на злото, за кое беше рекол дека ќе го нафрли врз нив, и не го нафрли.