Read Lamkang Броеви 24 Bible Online

Броеви 24 - Lamkang bible

Броеви 24

¹Валаам виде дека на Господ Му е пријатно да го благословува Израилот и не отиде во пресрет како порано, за да претскажува, а го сврти лицето кон пустињата.

²Погледна Валаам и го виде Израилот, како се беше сместил со племињата свои, а Духот Божји беше на него.

³И започнувајќи ја својата беседа, рече: »Валаам, синот Веоров, говори тој што ја гледа вистината.

⁴Зборува оној, кој ги слуша зборовите на Семоќниот; бидејќи видение Божјо виде во сон, и тоа му ги отвори очите.

⁵Колку се убави домовите твои, Јакове, и живеалиштата твои, о Израиле!

⁶Тие се распростираат како дубрави со сенки, како градини крај река, како куќи што ги изградил Господ, како кедри крај води;

⁷од семето негово ќе излезе човек, и ќе завладее многу народи, и царството негово ќе со возвиси погоре од царството на Гога, и ќе се преувеличи.

⁸Бог го изведе од Египет; тој е брз како еднорог, ќе ги голтне непријателски расположените народи спрема него, ќе им ги скрши коските нивни и со стрелите свои ќе го порази непријателот.

⁹Легнал тој како лав и како лавче; кој ќе го разбуди? Благословен да биде, оној што те благословува и проклет — оној што те проколнува!«

¹⁰Се разгневи Валак против Валаама, и плесна тој со рацете свои, па му рече на Валаама: »Јас те повикав да ги проколнеш непријателите мои, а ти ги благословуваш еве веќе по третпат;

¹¹бегај, пак, во земјата своја; јас сакав да ти искажам почит, но, ете, Господ те лишува од почестите.«

¹²И му рече Валаам на Валака: »Не ли им реков на твоите пратеници што ми ги испрати:

¹³‚Да ми ја дадеше Валак и куќата своја, полна со сребро и злато, не би можел да ја прекршам заповедта Господова, за да направам нешто добро или лошо по своја волја: она што ќе ми рече Господ, тоа и ќе го кажувам?‘

¹⁴И така, ете, јас си одам во своето место, но приближи се, за да ти кажам и да те посоветувам што ќе направи во последните дни овој народ со твојот народ.«

¹⁵И го раскажа видението свое, велејќи: »Валаам, синот Веоров, зборува човек со отворени очи,

¹⁶го зборува оној, што ги пази зборовите Божји, кој доби знаење од Севишниот, и откако виде видение Божјо во сон, очите му се отворија.

¹⁷Ќе му покажам, но не сега уште, го сакам но не одблиску. Изгрева ѕвезда од Јакова, и се издига довек од Израилот; тој ќе ги поразува кнезовите моавски и ќе ги заробува сите Ситови синови.

¹⁸И Едом ќе биде негово наследство, Сеир ќе завладее над непријателите свои, а Израил ќе ја покаже силата своја.

¹⁹Произлезениот од Јакова ќе завладее и ќе ги погуби преживеаните од градот.«

²⁰И го виде тој Амалика, и ја раскажа таа своја приказна, велејќи: Амалик е прв меѓу народите, но семето негово ќе се затре.

²¹И го виде и Кенеон, и пророкува, велејќи: »Силно е твоето живеалиште, на камен си го свил своето гнездо,

²²иако му е на Веор тоа гнездо на сплетки, Асирците ќе те заробат.«

²³И кога го виде Ога, пак пророкува, и рече: »Тешко, тешко, кој ќе остане жив, кога Бог ќе го направи тоа.

²⁴Ќе ги изведат од рацете Китиски, ќе го озлобат Асура, ќе го озлобат и Евера, но и самите ќе се уништат.«

²⁵И стана Валаам и се врати во местото свое, а исто така и Валак отиде по патот свој.