Read Lamkang Броеви 27 Bible Online

Броеви 27 - Lamkang bible

Броеви 27

¹И дојдоа ќерките на Салпаад, син на Офера, кој беше син на Галаада, а тој — син на Махир, од поколението на Манасија, син Јосифов, и еве ги имињата на ќерките негови: Мала, Нуа, Егла, Мелха и Терса;

²и откако застанаа пред Мојсеја, пред свештеникот Елеазар, пред кнезовите и пред целото општество, при влезот од скинијата на сведоштвото, рекоа:

³»Таткото наш умре во пустињата, и тој не беше меѓу соучесниците, што станаа против Господа заедно со луѓето на Кореј, туку умре поради свој грев, без синови.

⁴Зашто да се загуби името на таткото наш меѓу племето негово поради тоа што нема син? Дајте ни дел меѓу браќата на таткото наш!«

⁵И Мојсеј го изнесе прашањето нивно пред Господа.

⁶А Господ му рече на Мојсеја:

⁷»Право велат Салпаадовите ќерки; дај им наследствен дел меѓу браќата на таткото нивни и предај им го ним татковиот дел со жреб,

⁸а на синовите Израилеви јави им и кажи: ‚ако некој умре, и не остави син, предавајте го наследството негово на ќерките негови;

⁹ако, пак, тој нема ќерки, давајте го неговиот дел на браќата негови;

¹⁰ако нема браќа, дајте го неговиот дел на стриковците негови;

¹¹ако, пак, нема ни стриковци, дајте му го неговиот дел на најблискиот роднина негов од неговото поколение да го наследи; и нека биде тоа закон за синовите Израилеви, како што му заповедал Господ на Мојсеја!‘«

¹²И му рече Господ на Мојсеја: »Излези во онаа гора, која е од онаа страна на Јодан, во гората Навав, и погледај ја земјата Хананска, која им ја давам на синовите Израилеви во владение;

¹³и откако ќе ја погледаш, прибери се и ти при народот свој, како што се прибра Арон, братот твој на планината Ор;

¹⁴зашто вие не ја послушавте заповедта Моја во пустињата Син, кога меѓу општеството се појави расправија, да ја покажете пред очите нивни Мојата светост при водата. Тоа се водите на расправија при Кадес, во пуситњата Син.«

¹⁵И Му рече Мојсеј на Господа, велејќи:

¹⁶»Господ, Бог на духовите и на секоја плот, нека одреди над овој народ човек,

¹⁷кој ќе излегува пред нив, и кој ќе влегува пред нив, кој ќе ги изведува и кој ќе ги доведува, та да не остане народот Господов како овци без пастир.«

¹⁸И му рече Господ на Мојсеја: »Земи го Иисуса, Навиновиот син, човек, во кого има Дух, и положи ги врз него рацете свои.

¹⁹Престави го пред свештеникот Елеазар и пред целото општество, нареди му и заповедај за него пред целиот народ,

²⁰и дај му од славата твоја за да го слуша сиот народ на синовите Израилеви;

²¹а тој да се обрнува до свештеникот Елеазар и да се допрашува до него за решенија Господови; и според зборот негов да излегуваат и според зборот негов да влегуваат тој и сите синови Израилеви со него и целото општество.«

²²И направи Мојсеј како што му заповеда Господ Бог, и го зеде Иисуса, па го претстави пред свештеникот Елеазар и пред целото општество;

²³и ги положи врз него рацете свои и му даде совет, како што му заповеда Господ на Мојсеја.