Read Lamkang Броеви 34 Bible Online

Броеви 34 - Lamkang bible

Броеви 34

¹Му рече Господ на Мојсеј, велејќи:

²»Заповедај им на синовите Израилеви и кажи им: кога ќе влезат во Хананската земја, таа е земјата, кој ќе ви се падне во дел, земјата Хананска со пределите нејзини:

³вашата страна ќе биде онаа во југ, од пустињата Син, дури до Едом, како и пределот кон Лив, од крајот на Соленото Море откај исток,

⁴и да се граничи со пределите од југ до Акравинските возвишенија да минува кон југ кај Кадис-Варни да излегува кај полето Арад, минувајќи преку Аселмон;

⁵од Аселмон линијата да оди кон Египетската река и излегува кон морето.

⁶И морските предели да бидат ваши, предели што ги определува морето — тоа е морската граница.

⁷Откај север, пак, да имате граница: од големото море да ја измерите сами до горите,

⁸од горите таа да продолжува до Емат, и оттука свртува кон Садад;

⁹оттаму границата да продолжи кон Зефрон и да скршнува кон Арсенаин: тоа да ви биде северната граница.

¹⁰Источната граница измерете ја сами од Арсенаин до Сепфамара,

¹¹од Сепфамара да продолжи кон Вил до изворите, потоа таа прави завој до морето Кинерет, од источната страна;

¹²таа граница излегува на Јордан и прави завој кон Соленото Море. Тоа да ви биде земјата со границите нејзини наоколу.«

¹³Тогаш им заповеда Мојсеј на синовите Израилеви и рече: »Еве ја земјата што ќе ја поделите со жреб, која Господ заповеда да им се даде на деветте племиња и половината од племето Манасиево,

¹⁴зашто племето на Рувимовите синови според домовите нивни, и племето на Гадовите синови според домовите нивни, и половината од Манасиевото племе, го добија својот дел:

¹⁵двете племиња и половината племе го добија својот дел со жреб од ова страна на Јордан, спроти Јерихон на исток.«

¹⁶И му рече Господ на Мојсеја, велејќи:

¹⁷»Ова се имињата на мажите, што ќе ја поделат таа земја меѓу вас, свештеникот Елеазар, и Исус, Навиновиот син;

¹⁸а за делењето на земјата земете и по еден кнез од секое племе.

¹⁹А еве ги имињата на тие мажи: за Јудиното племе-Халев, синот Јефониев;

²⁰за племето на Симеоновите синови — Самуил, синот Амиудов;

²¹за Венијаминовото племе — Елдад, синот Хаслонов;

²²за племето на Дановите синови — кнезот Вакхир, Еглиновиот син;

²³за Јосифовите синови, за племето на Манасиевите синови — кнезот Анил, Ефодовиот син;

²⁴за коленото на Ефремовите синови — кнезот Камуил, синот Сафатанов;

²⁵за племето за Завулоновите синови — кнезот Елисафан, синот Фарнахов;

²⁶за племето на Исахаровите синови — кнезот Фалтиил, синот Озанов;

²⁷за племето на Асировите синови — кнезот Ахир, синот Селемиинов;

²⁸за племето на Нефталимовите синови — кнезот Фадаил, синот Амиудов.«

²⁹Тоа се оние, на кои Господ заповеда да ги поделат деловите меѓу синовите Израилеви во Хананската земја.