Read Lamkang Михеј 2 Bible Online

Михеј 2 - Lamkang bible

Михеј 2

¹Тешко им на оние што кројат беззаконија и на леглата свои измислуваат зли дела, и ги извршуваат штом ќе се зазори, зашто не ги издигнаа кон Господа рацете свои.

²Ќе пожелат ниви — ги заземаат насила, куќи — ги отимаат; и човекот го обираат, и куќата негова, мажот и наследството негово.

³Затоа вака вели Господ: »Еве Јас замислувам зло против тој род да пратам, кое не можете да го отфрлите од вратот свој, па затоа и нема да одите исправени; оти тоа време ќе биде лошо.

⁴Во она време ќе се зборува за вас, ќе плачат многу и ќе мислат: наполно сме разорени; делот од мојот народ е даден на друг; како да ми се врати? Нивните наши се веќе раздадени на другородци.«

⁵Затоа не ќе имам никого што ќе фрли жреб во собранието пред Господа.

⁶Не пророкувајте пророци; не пророкувајте им за да не ве постигне зло.

⁷О, ти, што се нарекуваш Јаковов дом! Зар се смали Духот Господов! Зборовите Мои зар не се благотворни за оној, кој постаува справедливо?

⁸Но народот, кој порано беше Мој, сега стана непријател, и вие им ја грабите не само горната туку и долната облека на мирните луѓе, што се враќаат од војна.

⁹Жените на Мојот народ ги истерувате од нивните пријатни домови; а од децата нивни ја одземате славата Моја.

¹⁰Станете и одете си, оти тој крај не е земја за почивка; поради нечистотија таа ќе биде разорена — и тоа со голема погибел.

¹¹Ако некој ветропир измислува лага и вели: »ќе ти проповедам за вино и за сикер«, тој би бил добар за пророк на овој народ.

¹²Навистина ќе те соберам сиот, Јакове, навистина ќе ги соберам остатоците Израилеви; ќе ги соберам во едно како овците во Восор, како стадо овци во кошара; ќе зазборуваат шумно поради многубројноста.

¹³Пред нив ќе тргне уривач на ѕидови; тие ќе ги разбијат преградите, ќе влезат низ портите и ќе излезат низ нив, и царот нивни ќе тргне пред нив, и Господ — ќе биде на чело.