Read Lamkang Михеј 3 Bible Online

Михеј 3 - Lamkang bible

Михеј 3

¹Затоа реков — чујте, поглавари Јаковови и кнезови на домот Израилев: зар вие не знаете што е право?

²А вие го мразите доброто и го сакате злото, ја дерете од нив кожата, и месото од коските нивни;

³јадете од телото на Мојот народ и ја дерете кожата нивна, а коските нивни ги стругнувате и ги кршите како за во сад, и месото нивно го дробите како за во котел.

⁴И тие ќе викаат кон Господа, но Он нема да ги чуе и ќе го сокрие лицето Свое од нив во времето, додека тие вршат злодејанија.

⁵Така вели Господ против пророците, кои го воведуваат во заблуда Мојот народ, кои гризат со заби — а проповедаат мир; а ако никој не им стави во уста ништо, против него објавуваат војна.

⁶Затоа, место видени, вие ќе гледате ноќ, место пророштво — темнина; и сонцето ќе зајде над тие пророци и денот ќе им потемнее над нив.

⁷Ќе се засрамат јасновидците, ќе бидат посрамени гледачите, и сите ќе ја затворат устата своја, зашто нема да добијат одговор од Бога.

⁸Но јас сум исполнет со силата на Духот Господен, со правда и цврстина, за да му ги кажам на Јакова престапите и на Израилот — гревот негов.

⁹Чујте ме сега, поглавари на домот Јаковов, и кнезови на домот Израилев, вие, кои се гнасите од правдата и што искривувате сѐ што е право.

¹⁰Вие, кои го градите Сион со крв и Ерусалим со неправда.

¹¹Поглаварите негови судат за подароци, свештениците учат за награди, а пророците пророкуваат за пари, и сепак се надеваат на Господа, велејќи: »Нели е Господ меѓу нас; затоа зло нема да нѐ постигне.«

¹²Затоа поради вас Сион ќе биде разорен како нива, а Ерусалим ќе стане купиште од урнатини, и планината на тој Дом ќе зарасне во шума.