Read Lamkang Михеј 4 Bible Online

Михеј 4 - Lamkang bible

Михеј 4

¹И, ете, затоа во последните дни планината на Господовиот Дом, ќе биде поставена на чело над сите планини, и ќе се издигне над ридовите, и ќе поитаат кон неа народите.

²И ќе тргнат многу народи, и ќе речат: »Дојдете да се искачиме на гората Господова и да влеземе во домот на Јакова — и Он ќе нѐ научи на Своите свети патишта, и ќе одиме по патеките Негови; зашто од Сион ќе излезе Законот, и од Ерусалим — словото Господово.

³Он ќе им суди на многу народи и ќе изобличи многу племиња во далечни краишта; па ќе ги прековаат мечевите свои во плугови и копјата свои — во српови; и народ против народ нема да крене веќе меч, и нема веќе да се учат да војуваат;

⁴секој ќе седи под лозата своја и под смоквата своја, и никој нема да се плаши, зашто устата на Господа Саваот го изрекла тоа.

⁵Зашто сите народи одат, секој во името на својот бог, а ние ќе одиме во името на Господа, нашиот Бог, секогаш и довека.«

⁶Во оној ден, вели Господ, ќе соберам сѐ што е хромо, и ќе соединам што е разгонето, и оние, врз кои сум допуштил беда.

⁷И ќе направам од остатокот на хромите и прснатите по светот силен народ, и Господ ќе царува над нив на гората Сион од сега па довека.

⁸А ти, куло на стадото, риду на Сионовата ќерка, при тебе ќе дојде и ќе се врати поранешното владение, царството — при ќерките ерусалимски.

⁹А зошто ти сега така гласно плачеш? Зар немаш цар или ти недостига советник, па те обзеле маки како кај родилка?

¹⁰Страдај и мачи се од болки, ќерко Сионова, како родилка, зашто сега ќе излезеш од градот, ќе живееш во полето и ќе стигнеш во Вавилон. Таму ќе бидеш избавена, таму ќе те откупи Господ од рацете на непријателите твои.

¹¹А сега се собрани многу народи против тебе и велат: »Нека биде осквернета и очите наши да се нагледаат на Сион!«

¹²Но тие не ги знаат замислите на Господа и не ги разбираат намерите Негови — дека Он ги собрал како снопје на гумно.

¹³Стани и удирај, ќерко Сионова, оти Јас ќе го направам рогот твој железен и копитата твои бакарни; ќе прегазиш многу народи, и нивните трудови и богатства ќе ги посветиш на Господа — Владетелот над целата земја.