Read Lamkang Наум 3 Bible Online

Наум 3 - Lamkang bible

Наум 3

¹Тешко му на крвничкиот град! Тој е полн со измама и убиства; грабењето не престанува во него.

²Се слуша плускање на бичеви и трескот од тркала како и од потскокнување на бојни коли.

³Коњаниците потскокнуваат, болскаат мечеви и светкаат копја. Многу убиени и купишта трупови! На труповите им нема крај; и се сопнуваат од нив.

⁴Тоа сето е за многуте блудствувања на убавата на изглед развратница, вешта во магии, која со блудот свој продава народи, а со магиите — племиња.

⁵Ете, Јас сум против тебе, вели Господ Саваот, ќе ја кренам полата од твојата облека врз твоето лице и ќе им ја покажам на народите твојата голотија, и на царствата — срамотиите твои.

⁶Ќе нафрлам врз тебе нечистотии, ќе те направам презрена, и ќе те направам за приказ.

⁷И секој, штом ќе те види, ќе побегне од тебе и ќе рече: »Разурната е Ниневија! Кој ќе сака да ја пожали? Каде да најдам утешител за тебе?«

⁸Зар не си подобра од Но — Амона, кој лежи меѓу реки, опколен со вода, чиј окоп е морето, и тоа му служеше како ѕид.

⁹Етиопија и Египет со безбројно множество луѓе ти служеа како поткрепа; а тие ти идеа на помош со Коптите и Ливијците.

¹⁰Но и тој е раселен, отиде во ропство; дури и децата му се здробени — по сите градски крстосници; а за првенците му фрлија жреб, и сите големци се во вериги оковани.

¹¹И ти така ќе се опиеш и ќе криеш; и ќе бараш заклон од непријателите свои.

¹²Сите твои градови се како смокви со зрели плодови: ако ги затресеш, ќе паднат право во устата на оној што сака да ги јаде.

¹³Ете, и народот твој во тебе се како жени: на непријателите твои ширум ќе им се отворат портите на земјата, и оган ќе ги проголта твоите резиња.

¹⁴Зафати си вода за опсадата; зацврсти ги тврдините; влези во кал, гази глина, направи ја печката за печење тули.

¹⁵Таму оган ќе те проголта, меч ќе те исече, ќе те изеде како гасеница, макар и да сте се намножиле како гасеници, па и да сте се намножиле како скакулци.

¹⁶Трговците при тебе се повеќе од ѕвездите на небото; но тие како скакулци ќе се распрскаат и ќе одлетаат.

¹⁷И кнезовите твои се како скакулци, а војводите — како рој мушички, кои во студено време се гнездат во пукнатини, а кога ќе изгрее сонцето се разлетуваат, и нема да го распознаеш местото каде биле.

¹⁸Спијат твоите пастири, царе асирски, почиваат твоите големци; твојот народ се распрснал по горите, и нема кој да ги прибере.

¹⁹Нема лек за твојата рана, лута е раната твоја. Сите, што ќе чујат за тебе, ќе ракоплескаат, зашто врз кого ли не си ја протегнал твојата постојана злоба.