Read Lamkang Авакум 3 Bible Online

Авакум 3 - Lamkang bible

Авакум 3

¹Молитвата на пророкот Авакум — за пеење.

²Господи, чув вест од Тебе и се уплашив. Господи, запази го делото Свое меѓу години, објави го во текот на годините, а во гневот Свој сети се на милост.

³Бог дојде од Теман и Светецот од гората Фаран. Величието Негово ги покри небесата, и славата Негова ја исполни земјата.

⁴Болскотот Му е како сончева светлина, а од рацете Негови зрачи, и тука е скривалиштето на Неговата сила.

⁵Пред лицето Негово врви поразија, а по стапките Негови ветар што гори.

⁶Он стана и земјата се затресе; погледа — и во трепет ги доведе народите; одамнешни планини се распаднаа, првобитните ридови се урнаа; но патиштата Негови се вечни.

⁷Натажени ги видов шаторите етиопски; се стресоа сениците на земјата Мадијамска.

⁸Зар против реките, Господи, пламнал гневот Твој? Зар против реките е Твоето негодување, или, пак, против морето е јароста Твоја — па си седнал на коњите Свои, на победничките бојни коли?

⁹Ти го извади лакот Свој според клетвениот завет, даден на колената, ја раздели земјата со реки.

¹⁰Кога те видов, планините затреперија, водите навалија; бездната го пушти гласот свој и угоре ги крена рацете свои.

¹¹Сонцето и месечината застанаа на своето место пред болскотот на вперените стрели Твои, пред светкањето на сјајните копја Твои.

¹²Во гнев одиш по земјата и во негодување ги газиш народите.

¹³Ти излегуваш за спасение на народот Твој, за спасение на помазаникот Свој. Ти ја поразуваш главата на нечестивиот дом, оголувајќи го од петите до врвот.

¹⁴Со копјата нивни Ти ја пронизуваш главата на нивните водачи, кога како виор се спуштаат да ме разбијат, радосни, оти мислеа дека скришум ќе го проголтаа сиромавиот.

¹⁵Со коњите Свои отвори пат преку морето, преку длабините на големите води.

¹⁶Јас чув и внатрешноста моја затрепери, при гласот Твој затреперија и усните мои, болка почувствував во коските мои, и местото под мене трепери; а јас требаше да бидам спокоен во денот на бедата, кога ќе дојде грабителот против мојот народ.

¹⁷Макар и да не процути смоквата, а и да нема плод по лозите, макар маслината и да откаже, и нивата да не даде плод, макар и овците да не останат во трлото, па и рогат добиток во оборите да нема,

¹⁸јас и тогаш ќе се радувам во Господа и ќе се веселам во Бога на моето спасение.

¹⁹Господ Бог е мојата сила: Он ќе ги направи нозете мои како на елен и ќе ме поведе по височините мои.