Read Lamkang Агеј 1 Bible Online

Агеј 1 - Lamkang bible

Агеј 1

¹Во втората година на царот Дарија, во шестиот месец, на првиот ден во месецот, би слово Господово преку пророкот Агеј до Зоровавела, синот на Салатиила, управител на Јудеја, и до Исуса, синот Јоседеков, првосвештеникот.

²Вака вели Господ Саваот: »Овој народ говори: Уште не е дојдено времето, не е време сега да се гради дом Господен.«

³И би слово Господово преку пророкот Агеј, велејќи:

⁴»А за вас време ли е да живеете во своите украсени домови, кога е Светилиштето запустено?«

⁵Затоа сега вака вели Господ Саваот: »Свртете го срцето ваше врз вашите патишта.

⁶Вие сеете многу а собирате малку; јадете, а не се заситувате; пиете, а не се напивате; се облекувате, но не се стоплувате; оној што печали пари, ги става во дупнато ќесе.«

⁷Така вели Господ Саваот: »Свртете го срцето ваше кон патиштата свои.

⁸Качете се на планината, донесете дрва и градете го храмот, и тоа ќе Ми биде угодно, па ќе се прославувам, вели Господ.

⁹Мислите многу, а излегува малку, и што ќе внесете дома, тоа Јас го раздувувам. Зошто? — вели Господ Саваот: Затоа што е домот Мој запустен, а вие пак трчате кон домот свој.

¹⁰Па поради тоа небото се затвори и не ви дава роса и земјата не ви дава плодови.

¹¹Затоа повикав суша врз земјата, врз горите, врз житото, врз гроздовите, врз елејот и врз сѐ што се раѓа од земјата, и врз човекот и врз добитокот, и врз секој ваш рачен труд.«

¹²И Зоровавел, Салатииловиот син, и Исус, синот на Јоседека, и сиот друг народ го послуша гласот на Господа, својот Бог, а и зборовите на пророкот Агеј, како гласник на нивниот Господ Бог, и народот се подуплаши од Господа.

¹³Тогаш Агеј, гласникот Господов, испратен од Господа, му рече на народот: »Јас сум со вас« — вели Господ.

¹⁴И Господ го подигна духот на Зоровавела, синот Салатиилов, управителот на Јудеја, духот на Исуса, синот Јоседеков, првосвештеникот, и духот на сиот друг народ — и тие дојдоа и почнаа да го градат домот на Господа Саваот, својот Бог;

¹⁵а тоа стана во дваесет и четвртиот ден од шестиот месец, во втората година на царот Дариј.