Read Lamkang Агеј 2 Bible Online

Агеј 2 - Lamkang bible

Агеј 2

¹Во седмиот месец, на дваесет и првиот ден од месецот, би слово Господово преку пророкот Агеј:

²»Кажи им сега на Зоровавела, синот Салатиилов, управителот на Јудеја, и на Исуса, Јоседековиот син, првосвештеникот, и на другиот народ:

³Кој од вас останал што го видел овој храм во неговата поранешна слава, а како вие сега го гледате овој? Не е ли овој како ништо во вашите очи?

⁴Но охрабри се сега, Зоровавеле, — вели Господ — ободри се, Исусе, сине Јоседеков, првосвештенику, охрабрете се сите народи овде — вели Господ — и работете, зашто Јас сум со вас«, вели Господ Саваот.

⁵»Мојот завет, што го склучив со вас, кога излеговте од Египет, и Мојот Дух ќе биде меѓу вас: не плашете се!«

⁶Оти вака вели Господ Саваот — »уште еднаш — и ете, скоро ќе се случи тоа — ќе ги затресам небото и земјата, морето и сувото;

⁷Ќе ги стресам сите народи — и ќе дојде Оној, Кого Го бараат сите народи и ќе се исполни овој Дом со слава«, вели Господ Саваот.

⁸»Среброто е Мое и златото е Мое« — вели Господ Саваот.

⁹»Славата на овој последен храм ќе биде поголема отколку на поранешниот — вели Господ Саваот; и на ова место ќе му дадам мир«, вели Господ Саваот.

¹⁰На дваесет и четвртиот ден од деветтиот месец, во втората година на Дарија, би слово Господово преку пророкот Агеј:

¹¹»Вака вели Господ Саваот — прашај ги свештениците за Законот и кажи —

¹²ако некој би носел осветено месо во полата од облеката своја, и со полата би се допрел до леб, или до нешто варено или до вино, или до елеј, или до што годе друго јадење, дали би се осветило тоа?« Одговорија свештениците и рекоа: »не.«

¹³Потоа пак рече Агеј: »Ако некој нечист од мртовец би се допрел до тоа, дали би станало тоа нечисто?« Одговорија свештениците и рекоа — »ќе стане нечисто.«

¹⁴Тогаш рече Агеј — таков е и овој народ, такво е и ова племе пред Мене, вели Господ, и такви се сите дела на рацете негови! Па што и да принесувате, сѐ ќе биде нечисто.

¹⁵А сега свртете го срцето на времето од овој ден наназад, кога уште не беше положен камен на камен во овој храм Господен.

¹⁶Порано, доаѓале до крстина, што дава до дваесет мери и, ќе се добиеле само десет; и до каца од педесет мери, а таа давала само дваесет мери.

¹⁷Ве поразував со гламја и со млечка по житата и со град во сите работи на рацете ваши, но вие не се обрнавте кон Мене, вели Господ.

¹⁸Свртете ги срцата ваши на времето од денес и наназад, од дваесет и четвртиот ден во овој деветти месец, од денот кога беше основан храмот Господен; обрнете ги срцата ваши:

¹⁹Има ли уште во житниците семе? Досега ни лозата, ни смоквата, ни нарот, ни маслината не даваа плод; а од денес Јас ги благословувам.

²⁰И би слово Господово до пророкот Агеј по вторпат на дваесет и четвртиот ден од месецот, и беше речено:

²¹»Кажи му на Зоровавела, управителот на Јудеја: ќе го затресам небото и земјата;

²²ќе урнам престоли на царства незнабожечки, ќе превртам бојни коли и оние што ќе седнат во нив, и кутнати ќе бидат и коњите и коњаниците нивни ќе паднат, еден од мечот на другиот.

²³Во тој ден, вели Господ Саваот, ќе те земам, Зоровавеле, сине Салтаилов, слуго Мој, вели Господ, и ќе те држам како печат, бидејќи те избрав.«