Read Lamkang Малахија 1 Bible Online

Малахија 1 - Lamkang bible

Малахија 1

¹Пророчко слово од Господа до Израилот преку Малахија.

²Ве засакав, вели Господ. А вие рековте: »Во што си покажал милост кон нас?« Зар Исав не е брат на Јакова, вели Господ, но сепак Јас го засакав Јакова,

³а Исава го замразив и ги предадов планините негови, за да се запустат, и пределите негови — на шакалите пустински.

⁴Ако Едом рече — ние сме разорени, но ќе се подигнеме сами, Господ Саваот вели — тие ќе се подигнат, но Јас пак ќе ги разурнам, и така ќе ги наречат — нечесен крај и народ — на кој се разгневил Господ засекогаш.

⁵И вие ќе го видите тоа, па ќе речете: се возвеличи Господ над пределите Израилеви.

⁶Синот го почитува татка си, а робот — господарот свој; а ако сум Јас татко, тогаш каде е почитта кон Мене? И ако сум Јас Господ, тогаш каде е стравот пред Мене — вели Господ Саваот; вие свештениците, кои го презирате името Мое, велите: во што го презираме името Твое?

⁷На жртвеникот Мој вие принесувате нечист леб, а велите, со што Те осквернуваме? — Со тоа што велите: трпезата Господова не заслужува почитување.

⁸И кога како жртва принесувате слеп добиток — не ли е тоа лошо, или кога принесувате хромо и болно, зар и тоа не е лошо? Ако го однесеш тоа на твојот кнез — ќе биде ли тој задоволен од тоа и ќе те прими ли со радост, вели Господ Саваот.

⁹И така, молете Му се на Бога за да нѐ помилува; но штом таква работа излегува од рацете ваши, ќе може ли Он тоа милостивно да го прими, вели Господ Саваот.

¹⁰Подобро е таков од вас да ја затвори вратата и да не се пали напразно оган на Мојот жртвеник. Не сте Ми мили, вели Господ Саваот, и не сакам да примам дар од вашите раце.

¹¹Зашто од сончев исток па сѐ до запад името Мое ќе стане големо меѓу народите, и тие на секое место ќе принесуваат темјан и чиста жртва; големо ќе стане името Мое меѓу народите, вели Господ Саваот.

¹²А вие го хулите со тоа што велите — трпезата Господова не заслужува почитување и користа од неа е мала.

¹³А притоа велите уште: и ете колку голем труд, а можеше и без тоа, вели Господ Саваот; принесувате крадено, хромо и болно, а притоа принесувате уште и таков лебен дар: па можам ли со благонаклоност да го примам тоа од вашите раце, вели Господ Саваот.

¹⁴Нека е проклет оној што лаже, оној кој во стадото свое има неповредено машко, а дал и завет, па во жртва на Господ Му принесува повредено; зашто Јас сум Цар голем и името Мое е страшно пред народите.