Read Lamkang 2. Макавејска 2 Bible Online

2. Макавејска 2 - Lamkang bible

2. Макавејска 2

¹Во записите на пророкот Јеремија се говори за тоа, тој им заповедал на преселуваните, да земат од гонот, како што е горе речено,

²и, откако им го дал на преселниците Законот, им заповедал да не ги забораваат заповедите на Господа и да не се заблудуваат во своите мисли, гледајќи ги златните и сребрените идоли и украси.

³Говорејќи им и за други слични работи, тој ги убедувал да не го отстрануваат Законот од своето срце.

⁴Во записите се вели и тоа дека овој пророк, по Божјо откровение, им заповедал да ги носат со себеси Скинијата и Ковчегот, па се искачил на гората, на која се искачил Мојсеј, и оттаму го гледал Божјото наследство.

⁵Откако пристигнал таму, Јеремија нашол пештерно живеалиште, каде што ги внесол Скинијата, Ковчегот и кадилниот жртвеник, а потоа го заѕидал влезот.

⁶Кога потоа дошле некои од неговите сопатници, за да стават белег на патот, не можеле да го најдат.

⁷А Јеремија ги укорил, штом разбрал за тоа, велејќи им дека тоа место ќе остане непознато сѐ додека Бог не се смилостиви и одново не го собере Својот народ.

⁸Токму тогаш Господ ќе ги открие тие работи, и ќе се појави славата Господова во облак, како што се појави во времето на Мојсеја и на Соломона, кога Му се молеле на Господа храмот да биде величествено посветен.

⁹Се говори и за тоа, оти Соломон, исполнет со мудрост, принел жртви за обновување и завршување на храмот.

¹⁰Како Мојсеј што Му се молел на Господа и слегнал оган од небото и ја проголтал жртвата, така се молел и Соломон, и огнот што слегнал, ја проголтал сепаленицата.

¹¹Мојсеј тогаш рекол: »Затоа што жртвата за грев не е за јадење, огнот ја проголта.«

¹²И Соломон празнувал осум денови.

¹³Во записите и во спомените на Неемија се раскажува и за тоа како направил библиотека, како ги собрал книгите за царевите, за пророците и за Давида, а и писмата на царевите за светите приноси.

¹⁴Исто така и Јуда ги собрал сите книги, кои биле изгубени поради војна што нѐ снајде, а сега ги имаме.

¹⁵Затоа, ако имате потреба од нив, пратете луѓе да ви донесат.

¹⁶Бидејќи имаме намера да го празнуваме очистувањето, затоа и ви пишав за тоа; но — добро ќе направите, ако и вие ги отпразнувате тие денови.

¹⁷А Бог, Кој го запази сиот Свој народ и на сите им даде наследство, царство, свештенство и светилиште,

¹⁸како што ни беше ветил во Законот, Он набргу, се надеваме на Него, ќе нѐ помилува и ќе нѐ собере од сите краишта под небото во светото место.

¹⁹Зашто Он нѐ избави од големи неволји и местото го очисти.

²⁰А за делата на Јуда Макавејски и на неговите браќа, за очистувањето на великиот храм и за обновувањето на жртвеникот,

²¹како и за војните против Антиоха Епифан и против неговиот син Евпатор,

²²и за појавите од небото, покажани на оние, кои се грижеа за Јудејците толку ревносно, така што, иако беа малубројни, ја ослободија целата земја и гонеа многубројни непријателски групи луѓе,

²³кои ја повратија славата на својот храм, познат во целиот свет, го ослободија градот и ги востановија законите, на кои им се заканувало пропаѓање, кога Господ се смилува на нив со Својата голема добрина —

²⁴сето ова го изложил Јасон Киринеецот во пет книги, но ние ќе се обидеме накратко да ги опишеме во една книга.

²⁵Имајќи ги предвид многуте работи и тешкотии, што произлегуваат од обемниот материјал, за оние што сакаат да се занимаваат со историски настани,

²⁶ние се погриживме да им дадеме душевна поука на тие што имаат желба за читање, олеснување — на оние што сакаат да помнат и полза за сите што ќе ја читаат,

²⁷иако за нас, кои се зафативме со тешката работа на скратување, ова ни најмалку не е лесно, а бара од нас напори и внимание,

²⁸како што не му е лесно ни на оној што подготвува гозба и сака да им биде корисен и на другите. Но, имајќи ја в предвид благодарноста на многумина, го преземаме овој труд доброволно врз себе.

²⁹Оставајќи му го на историчарот точното изложување на подробностите, ние ќе се трудиме да се раководиме од правилата на скратено изложување.

³⁰Како што градителот на една нова куќа треба да се грижи за целата нејзина градба, а оној што ќе се зафати со резба и живопис, своето внимание ќе треба да го сврти само на украсувањето, па така мислиме и ние за нашата работа.

³¹Да се вдлабочува и зборува за сѐ и да се иследува секоја посебност — тоа е својствено на првичниот историчар.

³²Оној, пак, што прави кратки изложувања, треба да биде краток и да ги избегнува исцрпните истражувања.

³³И така, како што рековме, да го почнеме кажувањето, зашто не е разумно да го развлекуваме предговорот на историјата, а самата историја да ја скратуваме.