Read Lamkang 3. Ездра 11 Bible Online

3. Ездра 11 - Lamkang bible

3. Ездра 11

¹И, ете, видов сон: од морето се издигаше орел, кој имаше дванаесет перјасти крилја и три глави.

²И видов: ете, тој ги ширеше крилјата над целата земја, сите небески ветрови дуваа врз него и облаци се собираа.

³И видов: дека од неговите перја му излегуваа други мали перја, а од нив излегуваа уште помали и покуси.

⁴Неговите глави мируваа, а средната глава беше поголема од другите две глави, исто така таа мируваше заедно со нив.

⁵И видов: орелот леташе на своите крилја и царуваше над земјата и над сите нејзини жители.

⁶И видов дека сѐ што е под небото — нему му беше послушно и никој не му се противеше — ниту едно од суштествата што постоеја на земјата.

⁷И ете, орелот застана на своите нокти и издаде глас кон своите перја, па рече:

⁸»Не бдејте сите заедно, секој нека спие на своето место, туку бдејте по ред,

⁹а главите нека се запазат за најпосле.«

¹⁰Видов дека гласот му излегуваше не од неговите глави, туку од средината на неговото тело.

¹¹Ги изброив неговите мали перја; тие беа осум.

¹²И, ете, од десната страна се издигна едно перо и се зацари над целата земја;

¹³и кога се зацари, настана неговиот крај и местото негово исчезна; потоа се издигна едно друго перо и тоа царуваше; тоа царуваше долго време.

¹⁴Откако царуваше и му се приближи крајот, за да исчезне и тоа, како и првото,

¹⁵ете, се чу глас, кој му велеше:

¹⁶»Слушај ти, кој толку долго владееш на земјата, еве што ти јавувам, пред да почнеш да исчезнуваш:

¹⁷по тебе нема никој да владее толку долго, како ти што владееше, ниту половината од тоа време.«

¹⁸Се издигна и третото перо и владееше како оние пред него, но и тоа исчезна.

¹⁹Така стана и со сите други: и тие владееја и најпосле засекогаш исчезнаа.

²⁰Видов дека одвреме-навреме од десната страна се издигнуваа и други перја, та и тие да владеат, и некои од нив и владееја, но потоа веднаш исчезнуваа;

²¹се издигнуваа и други од нив, но не добиваа власт.

²²Потоа веќе не се јавуваа дванаесетте перја, ниту двете мали перја,

²³а на телото од орелот не остана ништо, освен двете мирни глави и шесте мали перја.

²⁴Јас видов: од шесте мали перја две се одвоија и останаа под главата, која беше од десната страна, а четирите останаа на своето место.

²⁵Потоа поткрилните перја се обидуваа да се издигнат да владеат,

²⁶и, ете, едно се издигна, но веднаш исчезна;

²⁷и тие по нив исчезнаа уште побргу од првите.

²⁸И видов, ете, двете останати перја, исто така, се обидуваа да царуваат.

²⁹Кога тие се обидуваа, една од мирните глави, а тоа беше средната, се разбуди; таа беше поголема од другите две глави.

³⁰И видов дека двете други глави се соединија со неа.

³¹И таа глава, откако се сврте заедно со оние, кои беа соединети со неа, ги проголта двете поткрилни, што се обидуваа да царуваат.

³²Таа глава ја исплаши целата земја и владееше над земните жители со големи измачувања, и власта ја одржа над земјината топка повеќе отколку сите крилја, колку што ги имаше.

³³потоа видов дека и средната глава ненадејно исчезна, како и крилјата;

³⁴останаа двете глави, кои царуваа над земјата и над нејзините жители.

³⁵И, ете, главата што беше од десната страна ја проголта главата што беше — од левата страна.

³⁶И чув глас кој ми говореше: »Гледај пред себеси и размислувај за ова што го гледаш.«

³⁷И видов нешто слично на лав, кој излегол од гората и рика, издаде човечки глас кон орелот и рече:

³⁸»Слушај што ќе ти кажувам, и што ќе ти каже Севишниот:

³⁹Нели си ти оној што остана жив од четирите животни, што ги одредив да царуваат во Мојот свет, па преку нив да дојде крајот на оние времиња,

⁴⁰и четвртото од нив дојде, ги победи сите претходни животни, и светот го држеше во голем трепет и целата вселена — во тешко измачување и со потчинетите, и толку долго време најтежок притисок со подлост владееше на замјата?

⁴¹Ти не ѝ судеше на земјата според правдата:

⁴²ти ги притискаше кротките, мирољубивите ги навредуваше, ги сакаше лажливците, им ги уриваше живеалиштата на оние што не ти придонесуваа корист, им ги уриваше ѕидовите на оние што не ти причинуваа никаква навреда.

⁴³Твоето беззаконие стигна до Севишниот, твојата гордост — до Силниот.

⁴⁴Погледна Севишниот на времињата од гордоста, и, ете, тие се свршени, и мерката на нејзините беззаконија се исполни.

⁴⁵Затоа, исчезни ти, орлу, со твоите страшни крилја, со твоите грозни перја, со твоите зли глави, со твоите жестоки нокти и со сето твое грдо тело,

⁴⁶за да се одмори целата земја и да се избави од твоето насилство и да се надева на суд и милосрдност од својот Создател.«