Read Lamkang 3. Ездра 16 Bible Online

3. Ездра 16 - Lamkang bible

3. Ездра 16

¹Тешко ти на тебе, Вавилоне и Асијо, тешко ти Египте и Сиријо!

²Препашете се со кострет и власеница, оплакувајте ги вашите синови и тажете, зашто се приближи денот на вашата погибел.

³Врз вас е испратен меч, кој ќе го отклони?

⁴Врз вас е испратен оган, кој ќе го угасне?

⁵Врз вас се пратени зла, кој ќе ги отстрани?

⁶Ќе отера ли некој гледен лав во гората, ќе згасне ли за миг оган во слама, што почнал да гори?

⁷Ќе отфрли ли некој стрела, што е пуштена од силен стрелец!

⁸Силниот Господ ги испраќа бедните и кој ќе ги отстрани?

⁹Од неговиот гнев оган излегува, кој ќе го угасне?

¹⁰Он со молскавица ќе болсне, кој нема да се уплаши ќе загрми и кој нема да затрепери?

¹¹Господ ќе се закани, кој нема да се уплаши од Неговото лице?

¹²Се затресе земјата, и нејзините основи; морето се возбранува од своето дно; вознемирени се и брановите и рибите — од лицето на Господа и од големината на Неговата сила.

¹³Зашто десницата Негова е силна, која го затегнува лакот и остри се стрелите Негови што ги испушта; нема да ослабнат кога се испуштени дури до краиштата на земјата.

¹⁴ете, зла се испраќаат, и нема да се вратат си додека не дојдат на земјата.

¹⁵Пламнува оган, и нема да се изгасне, си додека не ги изгори основите на земјата.

¹⁶Како стрела, исфрлена од силен стрелец, што не се враќа, така не ќе се вратат ни маките, што ќе бидат испратени на земјата.

¹⁷Тешко ми, горко ми! Кој ќе ме избави во оние дни?

¹⁸Ќе почнат болести, и многумина ќе офкаат; ќе настане глад, и многумина ќе умираат; ќе започнат војни, и страв ќе ги опфати властите; ќе почнат неволјите и сите ќе се растреперат.

¹⁹Што ќе правам кога ќе наидат невојлите?

²⁰ете, гладот и раната, тагата и измачувањата се испратени како бичеви за поправка.

²¹Но и покрај сето тоа, луѓето нема да се одвратат ос своите беззаконија и за бичевите нема секогаш да си спомнуваат.

²²Ете, на земјата ќе настане ефтинија на си, и ќе помислат дека настанал мир, но токму тогаш тешкотии ќе ја постигнат земјата: меч, глад и голема бркотија.

²³Од глад ќе загинат големо множество жители на земјата, а оние што ќе преживеат од глад, ќе загинат од меч.

²⁴Труповите ќе бидат исфрлани како ѓубре; не ќе има кој да ги оплакува, зашто земјата ќе запустее и градовите нејзини ќе бидат разурнати.

²⁵Нема да остане кој да ја обработува и засејува земјата.

²⁶Дрвјата ќе раѓаат овошје, но кој ќе го бере?

²⁷Грозјето ќе узрее, но кој ќе го гмечи? Зашто насекаде ќе биде голема опустошеност.

²⁸Тешко ќе може човек да чуе друг човек, да го чуе неговиот глас,

²⁹зашто од жителите на градот нема да останат повеќе од десет души, а во селото двајца, оние што се сокриле во густи шуми или во процепи од карпи.

³⁰Како што во маслиновата градина некојпат оставаат на дрвјата три — четири маслинки,

³¹или како што во обрано лозје, оние што берат невнимателно ќе согледаат неколку несобрани грозда,

³²така во оние дни ќе останат двајца или тројца, кога ќе ги претресуваат нивните куќи со меч.

³³Земјата ќе запусти; нивите нејзини во плевел ќе обраснат, патиштата и сите нејзини патеки ќе обраснат со трња, зашто не ќе има кој да оди по нив.

³⁴Моми ќе плачат, оти не ќе имаат свршеници; жени ќе плачат зашто нема да имаат мажи; нивните ќерки ќе плачат, бидејќи не ќе има кој да им помага.

³⁵Свршениците нивни ќе бидат убиени во војна, а мажите нивни ќе загинат од глад.

³⁶Слуги на Господа, слушајте го ова и вразумувајте се!

³⁷Ова е словото на Господа, примете го и не верувајте им на боговите, за кои ви рече Господ.

³⁸Еве, маките се приближија и нема да задоцнат.

³⁹Како што бремената жена, кога на деветтиот месец ќе ѝ дојде времето да роди син, два или три часа до раѓањето нејзината утроба ја обземаат болки, а откако младенецот излезе од утробата, болките не продолжуваат ни еден миг потоа,

⁴⁰така и неволјите нема да задоцнат, за да дојдат на земјата; луѓето од тоа време ќе заофкаат; ќе ги обземат болки.

⁴¹Слушај ги овие зборови, народе мој; приготвувајте се за војна и среде неволји — бидете како туѓинци на земјата.

⁴²Оној што продава, нека биде како да се приготвува да бега, а оној што купува како оној што се приготвува за смрт;

⁴³трговецот — како да не очекува никаква придобивка, а оној што гради куќа — како да не се надева да живее во неа.

⁴⁴Сејачот нека мисли — дека нема да жнее, а лозарот — дека нема да бере грозје.

⁴⁵Оние што се женат и што се мажат — дека нема да раѓаат деца, а оние што не се женат — дека ќе бидат како вдовци.

⁴⁶Затоа, сите што се трудат, залудо се трудат.

⁴⁷Зашто од плодовите на нивниот труд туѓинци ќе се ползуваат, нивниот имот ќе го разграбаат, куќите нивни ќе ги урнат и синовите нивни ќе ги заробат, бидјќи тие ќе ги раѓаат своите деца во ропство и во глад.

⁴⁸Оние што се занимаваат со грабеж, колку подолго време ги украсуваат своите градови и своите куќи, своите имоти и своите лица,

⁴⁹толку повеќе ќе ги намразам заради нивните гревови, вели Господ.

⁵⁰Како блудница што мрази честита и високо морална жена,

⁵¹така и правдата ќе ја намрази неправдата, која се украсува и ќе ја обвини право в лице, кога ќе дојде Оној, Кој ќе го брани гонителот за секој грев на земјата.

⁵²Затоа не угледувајте се на неправдата и на нејзините дела,

⁵³зашто уште малку и неправдата ќе биде исфрлена од земјата, а правдата ќе се зацари над вас.

⁵⁴Грешникот да не вели дека тој не згрешил, зашто распалени јаглења ќе пламнат на главата на оној што говори: »Јас не сум згрешил пред Господа Бога и слава Му!«

⁵⁵Господ ги знае сите дела на луѓето и нивните замисли, помислите на нивното срце.

⁵⁶Он рече: »Нека биде земја«, и земја се појави, и »Нека биде небо« и стана.

⁵⁷Преку Неговиот збор ѕвездите се создадени; Он го знае нивниот број.

⁵⁸Он ги гледа бездните и она што е сокриено во нив; го измерил морето и она што е во него.

⁵⁹Преку Својот збор Он го затвори морето и земјата ја постави да лебди над водите.

⁶⁰Он го рашири небото како шатор, го основа врз води.

⁶¹Он создаде во пустињата водни извори и езера — на горските височини, за да течат реките од високи карпи, та да ја напојуваат земјата.

⁶²Он го создаде човекот и срцето му го стави среде неговото тело; во него вложи дух, живот и разум,

⁶³и дишењето е од Сесилниот Бог, Кој создал сѐ и гледа сѐ што е сокриено во земните скривалишта.

⁶⁴Он ја знае вашата намера, знае што мислите во вашите срца, кога грешите и сакате да ги сокриете вашите гревови.

⁶⁵Затоа Господ сосема јасно ги гледа сите ваши дека и сите ќе ве изобличи;

⁶⁶ќе бидете посрамени кога вашите гревови ќе бидат откриени пред луѓето; вашите беззаконија ќе застанат како обвинители во оној ден.

⁶⁷Што ќе направите и како ќе ги сокриете вашите гревови пред Бога и пред Неговите ангели?

⁶⁸Ете, Бог е Судија, од Него плашете се; оставете ги вашите гревови и засекогаш престанете да вршите беззаконија, и Бог ќе ве изведе и ќе ве избави од секоја мака.

⁶⁹Зашто, ете, против вас ќе се разгори јароста на многубројните војски, и ќе се фатат неколкумина од вас и ќе ве заколат за жртвен принос на идолите.

⁷⁰Оние, што ќе бидат нивни едномисленици, ќе ги изложат на подбив, на бесчестие и на понижување.

⁷¹Бидејќи во сите места и во соседните градови многумина ќе станат против оние што имаат страв од Господа;

⁷²ќе бидат избезумени, ќе разграбуваат не штедејќи никого и ќе опустошуваат сѐ што има кај оние кои се плашат од Господа;

⁷³ќе го опустошат и ќе го разграбат нивниот имот и ќе ги изгонат од нивните домови.

⁷⁴Тогаш ќе настане искушение за Моите избраници, како злато што се проверува преку оган.

⁷⁵Слушајте возљубени Мои, Господ говори: ете, пред вас стојат денови на жалост, а од нив Јас ќе ве избавам.

⁷⁶Не плашете се и не сомневајте се, зашто Бог е вашиот водач.

⁷⁷Ако ги исполнувате Моите заповеди и повелби, вели Господ Бог, вашите гревови нема да бидат товар, под кој ќе бидете притиснати и беззаконијата ваши нема да ве победат.

⁷⁸Тешко им на оние, кои се врзани со своите гревови и покриени со своите беззаконија!

⁷⁹Тоа е нива обрасната со грмушки, низ кој патот е покриен со трња, така што не може човек да помине: таа се напушта и ме се предава на огнот да ја исчисти.