Read Lamkang 3. Ездра 2 Bible Online

3. Ездра 2 - Lamkang bible

3. Ездра 2

¹Вака вели Господ: »Јас го изведов овој народ од ропство, му дадов заповеди преку Моите слуги — пророците, кои народот Мој не сакаше да ги слуша и ги отфрли Моите совети.

²Мајката што ги родила им вели: ‚Одете деца, зашто јас сум вдовица и напуштена.

³Јас ве одгледав со радост и ве отпуштив со плач и со тага, зашто згрешивте пред Господа, вашиот Бог и го извршивте она што е лошо пред Него.

⁴А сега што можам да направам за вас? Јас сум вдовица и напуштена; одете, деца, и барајте милост од Господ.‘

⁵Оче, Тебе Те повикувам за сведок против мајката на синовите, кои не сакаа да го пазат Мојот завет;

⁶предај ги на засрамување, а мајката нивна — на распаѓање, за да исчезне нивниот род;

⁷нека се распрснат нивните имиња меѓу народите и да се избришат од земјата, зашто го презреа Мојот завет.

⁸Тешко тебе, Асире, затоа што сокриваш безбожници во себеси! Роде лукав, спомни си што направив со Содом и Гомор;

⁹нивната земја лежи во смолести мочуришта и во височинки од пепел. Така ќе постапам со оние што не Ме слушаат«, вели Господ Седржителот.

¹⁰Вака му вели Господ на Ездра: »Јави му на Мојот слуга дека Јас ќе им го дадам Ерусалимското царство, што му го ветив на Израилот,

¹¹ќе примам од нив слава и ќе им ги дадам вечните живеалишта што сум ги направил за нив.

¹²Дрвото на животот ќе им биде маст со пријатна миризба; нема да бидат измачувани од тежок труд и нема да се изморуваат.

¹³Дојдете и примете; измолете за себе малку дни, за да не задоцните. Царството за вас веќе е готово; бидете бодри!

¹⁴Небо и земја, бидете сведоци за тоа, дека го уништив злото и направив добро. Жив сум Јас! вели Господ.

¹⁵Мајко, гушни ги своите синови; одгледувај ги со радост; како гулабица, закрепнувај ги нивните нозе, зашто Јас те избрав, вели Господ.

¹⁶Јас ќе ги кренам мртвите од нивните места и од нивните гробови ќе ги изведам, зашто името Свое го познав во Израилот.

¹⁷Не плаши се, мајко на синовите, зашто Јас те избрав, вели Господ.

¹⁸Јас ќе ти ги испратам на помош Моите слуги Исаија, и Јеремија, по чиј совет Јас ги осветив и ти подготвив дванаесет дрвја, оптоварени со различни плодови,

¹⁹а исто толку и извори, од кои тече мед и млеко и седум превисоки планини по кои растат ружи и кринови, преку кои со радост ќе ги исполнам синовите твои.

²⁰Погрижи се за правата на вдовицата, дај правда на сиромав, помогни му на оној што е во неволја, заштити сирак, облечи необлечен,

²¹погрижи се за обесправен и немоќен, не подбивај се со хром, помогни му на оној што нема раце, а слепиот доведи го да ја види Мојата светлина,

²²старец и младич запази меѓу твоите ѕидови;

²³мртви, каде и да ги најдеш, откако ги приготвиш, предај ги во гроб, а Јас ќе ти го дадам првото место во Моето воскресение.

²⁴Почивај и биди спокоен, народе Мој, зашто ќе дојде твоето спокојство.

²⁵Добра доилко, дој ги добро твоите синови, закрепнувај ги нозете нивни.

²⁶Од слугите што ти ги дадов, да не загине никој, зашто од тебе ќе ги барам.

²⁷Не скрби се, зашто кога ќе дојде денот на скрб и тешкотија другите ќе плачат и ќе се скрбат, а ти ќе бидеш весела и ќе имаш изобилство.

²⁸Незнабошците ќе ти завидуваат, но ништо не ќе можат да направат против тебе, вели Господ.

²⁹Моите раце ќе те покријат, та синовите твои да не го видат пеколот.

³⁰Утешувај се, мајко со твоите синови, зашто Јас ќе те спасам.

³¹Сеќавај се на твоите синови што спијат, зашто Јас ќе ги изведам од краиштата на земјата и ќе им покажам милост, бидејќи сум милостив,« вели Господ Седржителот.

³²»Прегрни ги твоите деца додека дојдам и им направам милост, зашто Моите извори се изобилни и Мојата благодат никогаш не е скудна.«

³³Јас Ездра примив на гората Орив заповед од Господа да појдам кај Израел. А кога дојдов кај нив, тие ме исфрлија и ја презреа заповедта на Господа.

³⁴Затоа ви говорам вам, незнабошци, кои можете да слушате и да разбирате: очекувајте Го Пастирот ваш; Тој ќе ви даде вечен мир; близу е Оној, Кој ќе дојде на крајот на векот.

³⁵Бидете готови за наградите од царството, зашто вечна светлина ќе ве огрее за вечни времиња.

³⁶Бегајте од сенката на овој век; примете ја сладоста од вашата слава. Јас јавно сведочам за Спасителот мој.

³⁷Примете го дарот што ви е даден и насладувајте се, благодарејќи Му на Оној Кој ве повикал во царството небесно.

³⁸Станете и стојте и гледајте колкав е бројот на оние што се обележени за вечерата на Господа,

³⁹кои, откако се преселија од сенката на овој век, примија од Господа светли облеки.

⁴⁰Сионе, прими го бројот свој и заклучи ги твоите — оние што се облечени во бела облека и што го исполниле законот на Господа.

⁴¹Полн е бројот на твоите сакани синови; моли се за царството на Господа, за да се освети народот твој, кој е повикан уште од почетокот.

⁴²Јас, Ездра, на гората Сион видов големо множество, кое не можев да го пребројам; тие сите со песни Го прославуваа Господа.

⁴³Меѓу нив беше висок младич, кој ги надминуваше сите; тој им ставаше венци на главата на секого од нив и со тоа уште повеќе се издигнуваше; јас бев потресен од она што го гледав.

⁴⁴Тогаш го прашав ангелот: »Господаре мој, кои се овие?«

⁴⁵Тој ми одговори и ми рече: »Овие се оние што го оставиле смртното тело и се облекле во бесмртно, оние што го исповедат името Божјо; сега ги овенчуваат и добиваат победнички палми.«

⁴⁶Јас прашав: »А кој е оној младич што им ги става венците и што им ги врачува палмите?«

⁴⁷Тој ми одговори: »Синот Божји, Кого тие Го прославувале во овој живот«. И јас почнав да ги прославувам оние што стоеја цврсто за името на Господа.

⁴⁸Тогаш ангелот ми рече: »Оди и јави му на мојот народ колку и какви чудесни дела на Господа Бога си видел.«