Read Lamkang 3. Ездра 3 Bible Online

3. Ездра 3 - Lamkang bible

3. Ездра 3

¹Во триесеттата година по разурнувањето на градот, јас бев во Вавилон, и додека лежев смутен во постелата, ми доаѓаа мисли во срцето,

²затоа што го видов опустошувањето на Сион и богатството на оние што живеат во Вавилон.

³Духот мој се вознемири и со страв почнав да говорам кон Севишниот,

⁴па реков: »Владетелу, Господи, Ти во почетокот рече, кога Ти самиот ја основа земјата, и ѝ заповеда на земјата,

⁵да му даде на Адам смртно тело, кое беше, исто така, создание на Твоите раце; Ти вдахна во него дух за живот, и тој стана жив пред Тебе;

⁶Ти го воведе во рајот што го насади Твојата десница, пред земјата да роди плодови.

⁷Ти му заповеда да ја пази Твојата заповед, но тој ја наруши; Ти го осуди на смрт, него и неговиот пород. Од него произлегоа поколенија и племиња, народи и фиданки од нив, кои немаат број.

⁸Секој народ почна да прави што сака, да прави неразумни дела пред Тебе и да ги презира Твоите заповеди.

⁹По извесно време Ти испрати потоп врз жителите на земјата и ги истреби;

¹⁰И иста судбина ги снајде сите нив? Како што смртта го погоди Адам, така потопот ги погоди нив.

¹¹Само еден од нив остави — Ное со неговите чеда; од него произлегоа сите праведници.

¹²Кога жителите на земјата почнаа да се размножуваат, се намножија многу синови, народи и поколенија, и пак почнаа да се предаваат на безбожност, повеќе од поранешните.

¹³Кога почнаа да прават беззаконија пред Тебе, Ти тогаш меѓу нив го избра човекот, чие име беше Авраам;

¹⁴него го возљуби и само нему му ја откри Твојата волја;

¹⁵со него склучи вечен завет и му рече дека никогаш нема да го оставиш семето негово. Му го даде синот Исак, и на Исак — синовите Јаков и Исав.

¹⁶Ти го избра Јаков, а Исав го отфрли, и Јаков се размножи прекумерно.

¹⁷Кога го изведе неговото семе од Египет и го доведе до гората Синај,

¹⁸тогаш ги преклони небесата, ја уреди земјата, ја растресе вселената, ги приведе бездните во трепет и целиот свет се вознемири.

¹⁹Твојата слава помина низ четири појави: оган, земјотрес, бурен ветар и мраз, за да му даде закон на семето Јаковово и усрдност на родот Израелов,

²⁰но не им го одзеде нивното лукаво срце, та законот Твој да даде плод во нив.

²¹Со своето лукаво срце прв ја прекрши заповедта Адам и беше победен; така стана и со сите што произлегоа од него;

²²во срцето на народот остана немоќта и законот со корен од злото; доброто отстапи, а злото остана.

²³Измина многу време, се исполнија години и Ти си издигна слуга по име Давид;

²⁴му заповеда да изгради град на Твое име и во него да Ти принесува темјан и жртви.

²⁵Ова се извршуваше многу години, а подоцна жителите на градот згрешија;

²⁶отстапија од сѐ, постапија така, како што постапи Адам и сите негови потомци; зашто и тие имаа лукаво срце.

²⁷А Ти им го предаде Твојот град во рацете на Своите непријатели.

²⁸Па зар подобро постапуваат жителите на Вавилон и затоа владеат со Сион?

²⁹Кога дојдов овде, видов безредија што немаат број; во таа триесетта година од ропството душата моја гледа многу грешници и срцето мое се стопи.

³⁰Видов како ги трпиш тие грешници, ги заштитуваш беззакониците; а Својот народ го погуби, непријателите, пак, Твои ги запази и за тоа никого не го извести.

³¹Навистина не можам да разберам како можел тој пат да се измени. Зар Вавилон постапува подобро од Сион?

³²Дали Те познал некој друг народ, освен Израел? Кои племиња веруваа во Твоите завети, како што веруваше Јаков?

³³И наградата нивна не е еднаква, ни трудот нивни донел плод; зашто јас одев меѓу народите и видов, дека живеат во изобилие, иако не си спомнуваат за Твоите заповеди.

³⁴Измери ги на кантар нашите беззаконија и делата на сите што живеат на земјата, и Твоето име нема никаде да се најде, освен во Израел.

³⁵Кога земните жители не грешеле пред Тебе? Или кој народ ги запазил Твоите заповеди?

³⁶Меѓу нас ќе најдеш барем некои што ги пазат Твоите заповеди, а меѓу другите народи нема да најдеш.«