Read Lamkang Матеј 2 Bible Online

Матеј 2 - Lamkang bible

Матеј 2

¹А кога се роди Исус во Витлеем Јудејски, во дните на цар Ирода, ете, дојдоа во Ерусалим мудреци од Исток и рекоа:

²Каде е новородениот Цар Јудејски? Ја видовме Неговата ѕвезда на Исток, па дојдовме да Му се поклониме.

³Штом го чу тоа, цар Ирод се уплаши и целиот Ерусалим со него.

⁴И кога ги собра сите првосвештеници и книжници народни, ги праша: »Каде треба да се роди Христос?«

⁵А тие му одговорија: »Во Витлеем Јудејски; зашто така е напишано преку пророкот:

⁶И ти, Витлееме, земјо Јудина, по ништо не си помал меѓу војводствата Јудини; оти од тебе ќе излезе Водач што ќе го пасе Мојот народ — Израилот.«

⁷Тогаш Ирод тајно ги повика мудреците и дозна од нив точно за времето, кога се појавила ѕвездата,

⁸па, испраќајќи ги во Витлеем, рече: »Отидете и распрашајте се добро за Младенецот и, штом ќе Го најдете, јавете ми за да отидам и јас да Му се поклонам.«

⁹Тие, откако го ислушаа царот, си заминаа. И, ете, ѕвездата, што ја беа виделе на Исток, врвеше пред нив, додека не пристигна и се запре над местото, каде што беше Младенецот.

¹⁰А кога ја видоа ѕвездата, тие се зарадуваа со многу голема радост.

¹¹И штом влегоа во куќата, Го видоа Младенецот со мајка Му Марија, и паднаа, па Му се поклонија; а кога ги отворија своите ковчежиња, Му принесоа дарови: злато, ливан и измирна.

¹²И кога примија в сон вест, не се вратија веќе при Ирода, а си заминаа по друг пат за својата земја.

¹³А штом си отидоа тие, ете, ангел Господов му се јави на Јосифа в сон, велејќи: »Стани, земи Го Младенецот и мајка Му, па бегај во Египет и остани таму дури не ти кажам, бидејќи Ирод ќе Го бара Младенецот за да Го погуби.«

¹⁴И тој стана, Го зеде Младенецот и мајка Му ноќно време, па отиде во Египет.

¹⁵И таму беше до смртта Иродова, за да се исполни реченото од Господа преку пророкот, кој вели: »Од Египет Го повикав Синот Свој.«

¹⁶Тогаш Ирод, кога виде дека мудреците го измамија, се разгневи многу и прати, та ги уби сите младенци во Витлеем и по целата негова околина од две години и помали, според времето што точно го беше узнал од мудреците.

¹⁷Тогаш се исполни кажаното преку пророкот Јеремија, кој говори:

¹⁸Глас се слуша во Рама, плач и ридање, и пискот голем: Рахил плаче за своите деца и не сака да се утеши, зашто ги нема.

¹⁹А по смртта Иродова му се јави на Јосифа насон во Египет ангел Господов

²⁰и му рече: »Стани, земи Го Младенецот и мајка Му, и отиди во земјата Израилева, зашто изумреа оние што ја бараа душата на Младенецот.«

²¹Тој стана, Го зеде Младенецот и мајка Му, и дојде во земјата Израилева.

²²Но, кога чу дека во Јудеја царува Архелај, место татка си Ирода, се уплаши да отиде таму; и откако доби вест в сон, тој замина во пределите Галилејски.

²³А кога пристигна, се насели во градот наречен Назарет, за да се исполни кажаното преку пророците дека Он ќе се нарече Назареец.