Read Lamkang Матеј 5 Bible Online

Матеј 5 - Lamkang bible

Матеј 5

¹Кога го виде народот, Он се искачи на планината; а штом седна, учениците Негови се приближија до Него.

²И кога ја отвори устата Своја, ги поучуваше и говореше:

³»Блажени се бедните по дух, зашто нивно е царството небесно!

⁴Блажени се оние што плачат, оти ќе се утешат!

⁵Блажени се кротките, зашто тие ќе ја наследат земјата!

⁶Блажени се гладните и жедните за правда, оти тие ќе се наситат!

⁷Блажени се милостивите, зашто тие ќе бидат помилувани!

⁸Блажени се чистите по срце, оти тие ќе Го видат Бога!

⁹Блажени се миротворците, зашто тие ќе се наречат синови Божји!

¹⁰Блажени се гонетите заради правда, бидејќи нивно е царството небесно!

¹¹Блажени сте вие, кога ќе ве срамат и прогонат и кога ќе говорат против вас секакви лоши зборови лажно — заради Мене!

¹²Радујте се и веселете се зашто голема е вашата награда на небесата! Така ги гонеа и пророците што беа пред вас.

¹³Вие сте солта на земјата. Но, ако солта ја изгуби силата, со што ќе се осоли? Таа веќе за ништо не е, освен да се фрли надвор и изгази од луѓето.

¹⁴Вие сте светлината на светот. Не може да се сокрие град, што се наоѓа на врв планина.

¹⁵Ниту, пак, светило се пали и клава под поклоп, туку на свеќник и им свети на сите в куќи.

¹⁶Така треба да свети пред луѓето и вашата светлина, за да ги видат вашите добри дела и да Го прослават вашиот Отец небесни.

¹⁷Немојте да мислите дека сум дошол да го поништам Законот или Пророците; не сум дошол да ги поништам, туку да ги исполнам.

¹⁸Зашто, вистина, ви велам: дури постојат небото и земјата ниту една јота или црта од Законот нема да се измени, додека не се исполни сѐ.

¹⁹И така, оној што ќе наруши една од тие најмали заповеди и така ги научи луѓето, најмал ќе се нарече во царството небесно; а оној што ќе ги исполни и поучи, тој голем ќе се нарече во царството небесно.

²⁰Зашто ви велам, ако вашата праведност не ја надмине праведноста на книжниците и фарисеите, вие нема да влезете во царството небесно.

²¹Сте слушале дека им било речено на старите: ‚Не убивај! А кој убие, виновен е пред судот‘.

²²Јас, пак, ви велам дека секој, што се гневи на брата си без причина, ќе биде виновен пред судот; а оној што ќе го нарече брата си ‚празноглав‘, ќе биде виновен пред врховниот суд; оној, пак, што ќе рече ‚будала‘, ќе биде виновен за во пеколот.

²³И така, ако принесуваш дар на жртвеникот и таму се сетиш дека брат ти има нешто против тебе,

²⁴тогаш остави го дарот таму, пред жртвеникот, па отиди и најнапред помири се со брата си, а потоа дојди и принеси го дарот.

²⁵Измири се со противникот твој навреме, уште додека си на пат со него, за да не те предаде на судијата, а судијата — на слугата и да бидеш затворен;

²⁶вистина, ти велам: нема да излезеш оттаму сѐ дури не го дадеш и последниот кодрант.

²⁷Сте слушале дека на старите им било речено: ‚Не прељубодејствувај!‘

²⁸Јас, пак, ви велам дека секој што ќе погледне на жена со желба, тој веќе извршил прељуба со неа во срцето свое.

²⁹Ако те соблазнува десното око, извади го и фрли го од себе; зашто подобро ти е да погине еден дел од твоето тело, отколку целото да биде фрлено во пеколот.

³⁰И десната рака, ако те соблазнува, исечи ја и фрли ја од себе; оти подобро ти е да погине еден твој дел, отколку целото твое тело да биде фрлено во пеколот.

³¹Речено било исто така: ‚Ако некој ја остави својата жена, нека ѝ даде развод‘.

³²А Јас пак ви велам: секој што ќе ја остави својата жена, освен за прељуба, тој ја тера да прељубодејствува; и кој се ожени со така напуштена, тој прељубодејствува.

³³Сте го слушале уште и тоа дека им било речено на старите — ‚Не колни се криво, а заклетвите пред Господа исполнувај ги‘.

³⁴Јас, пак, ви велам: не колнете се воопшто — ниту во небото, оти тоа е престол Божји;

³⁵ниту во земјата, зашто таа е подножје на нозете Негови; ниту во Ерусалим, оти е град на великиот Цар.

³⁶Не колни се ни во главата своја, зашто не можеш ниту едно влакно од косата своја да го направиш бело или црно.

³⁷Но зборот ваш да биде: да, да, — не, не, а сѐ што е повеќе од тоа, од лукавиот е.

³⁸Сте слушале дека е речено: ‚Око за око, заб за заб‘.

³⁹Јас, пак, ви велам: да не се противите на злото. Ако некој те удри по десниот образ, заврти му го и другиот.

⁴⁰А оној што сака да се суди со тебе и да ти ја земе кошулата, дај му ја и горната облека.

⁴¹И ако некој те присили да одиш со него една милја, ти оди две.

⁴²На оној што бара од тебе, дај му, и не го одбивај оној што ти сака нешто на заем.

⁴³Сте слушале дека е кажано — ‚Љуби го својот ближен и мрази го непријателот‘.

⁴⁴А Јас, пак, ви велам: љубете ги непријателите свои, благословувајте ги оние што ве колнат, правете им добро на оние што ве мразат и молете се за оние што ве навредуваат и гонат,

⁴⁵за да бидете синови на вашиот Отец небесен; зашто Он го остава Своето сонце да грее над лошите и над добрите, и праќа дожд на праведните и на грешните.

⁴⁶Оти, ако ги љубите оние што ве милуваат вас, каква ќе ви биде наградата? Зар не го прават тоа и митниците?

⁴⁷И, ако ги поздравувате само браќата свои, што особено правите? Не постапуваат ли така и незнабошците?

⁴⁸Но бидете совршени, како што е совршен вашиот Отец небесен.«