Read Lamkang Матеј 7 Bible Online

Матеј 7 - Lamkang bible

Матеј 7

¹»Не судете, за да не бидете судени;

²оти, со каков суд судите, со таков ќе бидете судени; со каква мерка мерите, со таква и ќе ви се мери.

³Зошто ја гледаш раската во окото на брата си, а гредата во своето око не ја чувствуваш?

⁴Или, како ќе кажеш на брата си — чекај да ти ја извадам раската од окото; а, пак, ете, во твоето око има греда?

⁵Лицемере, извади ја прво гредата од твоето око, па тогаш ќе видиш како да ја извадиш раската од окото на брата си.

⁶Светињата не ја давајте на кучињата, и не си го фрлајте бисерот пред свињите, за да не го изгазат со своите нозе, и откако се повратат, да не ве раскинат.

⁷Сакајте и ќе ви се даде; барајте и ќе најдете; чукајте и ќе ви се отвори;

⁸зашто секој што сака, добива, и кој бара, наоѓа, и на оној што чука, ќе му се отвори.

⁹Има ли меѓу вас човек, кој, ако му посака неговиот син леб, да му даде камен,

¹⁰и кога посака риба, да му даде змија?

¹¹И така, ако вие, бидејќи лоши, умеете да им давате на своите чеда добри дарови, колку повеќе вашиот Отец небесен ќе им даде добра на оние што Му бараат?

¹²Сѐ она што сакате да ви прават луѓето, правете им го и вие; оти тоа се Законот и Пророците.

¹³Влезете низ тесната врата; оти широки се вратите и широк е патот што води кон пропаст, и мнозина минуваат низ нив;

¹⁴а тесни се вратите и тесен е патот што водат кон животот, и малцина го наоѓаат.

¹⁵Пазете се од лажните пророци, кои доаѓаат во овча кожа, а однатре се волци грабливи.

¹⁶По нивните плодови ќе ги познаете. Се бере ли грозје од трње, или смокви од чичка?

¹⁷Па така, секое добро дрво дава добри плодови, а лошо дрво дава лоши плодови;

¹⁸не може добро дрво да дава лоши плодови, нити лошо дрво да дава добри плодови.

¹⁹Секое дрво, што не дава добар плод, го сечат и го фрлаат во оган.

²⁰И така, по нивните плодови ќе ги познаете.

²¹Не секој што Ми вели: ‚Господи, Господи‘, ќе влезе во царството небесно, а оној што ја исполнува волјата на Мојот Отец небесен.

²²Мнозина ќе ми речат во оној ден: ‚Господи, Господи, не во Твое ли име пророкувавме? И зар во Твое име бесови не изгонувавме? И не во Твое ли име многу чуда правевме?‘

²³И тогаш Јас ќе им кажам: ‚Никогаш не сум ве познавал; бегајте од Мене вие што правите незаконски дела!‘

²⁴И така, секој, што ги слуша и исполнува овие Мои зборови, ќе биде како благоразумен маж, кој си направил куќа на камен.

²⁵И заврна дожд и надојдоа реки, и дувнаа ветрови, и навалија на таа куќа, но таа не падна, оти беше изградена на камен.

²⁶А секој, што ги слуша овие Мои зборови и не ги исполнува, прилега на човек глупав, кој си направил куќа на песок.

²⁷И заврна дожд, и надојдоа реки, и дувнаа ветрови, и навалија на таа куќа, и таа падна, а паѓањето ѝ беше страшно.«

²⁸И кога ги заврши овие зборови, народот се чудеше на Неговото учење,

²⁹зашто Он ги поучуваше како Оној, Кој има власт, а не како книжниците.