Read Lamkang Лука 21 Bible Online

Лука 21 - Lamkang bible

Лука 21

¹Кога ги подигна очите, виде како богатите ги пуштаа своите прилози во црковната каса;

²виде исто така и една бедна вдовица, која пушти таму две лепти,

³па рече: »Вистина ви велам, оваа бедна вдовица од сите повеќе пушти;

⁴сите овие дадоа прилози на Бога од својот вишок; таа, пак, пушти — сѐ што имаше за својот живот.«

⁵И кога некои зборуваа за храмот, дека е украсен со убави камења и ветени дарови, Он им рече:

⁶Ќе дојдат дни и од сето ова што го гледате нема да остане ни камен, што не ќе биде урнат.

⁷И Го прашаа, говорејќи: »Учителе, а кога ќе биде тоа и каков е знакот, дека ќе стане тоа?«

⁸Он рече: »Чувајте се, да не ве прелажат; зашто мнозина ќе дојдат во Мое име и ќе зборуваат оти сум Јас, и дека времето се приближи. Но, не одете по нив!

⁹А кога ќе чуете за војни и бунтови, не плашете се; сето тоа треба да стане, но сѐ уште не е крајот.«

¹⁰Тогаш им рече: »Ќе се крене народ против народ, и царство против царство;

¹¹а на некои места ќе има и големи потреси, и глад и помор; ќе има стравотии и големи знаци на небото.

¹²А пред сето тоа ќе стават раце на вас и ќе ве изгонат, предавајќи ве на синагогите и затворите, и ќе ве водат пред цареви и управници, заради Моето име.

¹³И тоа ќе ви биде вам за сведоштво.

¹⁴И така, ставете си при срце да не размислувате однапред што ќе одговарате,

¹⁵зашто Јас ќе ви дадам уста и мудрост, на која не ќе можат да ѝ противречат ниту да ѝ се противстават сите ваши противници.

¹⁶Ќе бидете предадени исто така и од родители, и од браќа и од роднини, и од пријатели, а некои од вас ќе бидат убиени;

¹⁷и ќе бидете намразени од сите, заради Моето име.

¹⁸Но, ни влакно од главата ваша нема да загине;

¹⁹со трпение спасувајте си ги душите.

²⁰А кога ќе го видите Ерусалим опколен од војски, знајте — дека се приближило неговото запустување.

²¹Тогаш, оние што се наоѓаат во Јудеја, нека бегаат во планините; и кои се во градот, да излезат од него; а кои се по околните места, нека не влегуваат во него,

²²зашто тоа се дните на одмазда, за да се изврши сѐ што е напишано.

²³Но тешко на бремените и доилките во тие дни: зашто голема мака ќе биде на земјата, и гнев врз овој народ;

²⁴и ќе паднат од сечилото на мечот, и ќе бидат одведени во плен по сите народи; а Ерусалим ќе го газат незнабошци, сѐ додека не се свршат времињата на незнабошците.

²⁵И ќе има знаци на сонцето, и на месечината, и на ѕвездите; а на земјата — тага кај народите од неизвесноста и од бучењето на морето, и од брановите;

²⁶луѓето, пак, ќе умираат од страв и од исчекување на она што ќе го снајде светот, зашто и силите небески ќе попуштат.

²⁷И тогаш ќе Го видат Синот Човечки како доаѓа на облаци, со сила и слава голема.

²⁸А кога ќе почне тоа да станува, исправете се и подигнете ги главите свои, зашто се приближува вашето спасение.«

²⁹Им кажа парабола: »Погледајте ја смоквата и сите дрвја;

³⁰кога ќе видите дека потеруваат, сами знаете оти летото е веќе близу.

³¹Па така, кога ќе видите дека станува ова, знајте оти се приближи царството Божјо.

³²Вистина ви велам, нема да премине овој род, дури сето тоа не се исполни.

³³Небото и земјата ќе преминат, но зборовите Мои нема да преминат.

³⁴Само пазете се: вашите срца да не бидат оптоварени со прејадување и пијанство, и грижа за овој свет, за да не ве затече оној ден ненадејно;

³⁵оти тој ќе дојде како примка за сите што живеат по целата земја;

³⁶бидете будни во секое време и молете се, за да го избегнете сето она, што ќе настане, и да се исправите пред Синот Човечки!«

³⁷Дење проповедаше Он во храмот, а ноќе излегуваше и ноќеваше во гората, наречена Елеонска.

³⁸И сиот народ доаѓаше наутро при Него во храмот, за да Го слуша.