Read Lamkang Второзаконие 23 Bible Online

Второзаконие 23 - Lamkang bible

Второзаконие 23

¹Оној што е скопен или кастрен не влегува во општеството Господово:

²ниту син на блудница да влегува во Господовиот храм, ни десеттото колено негово.

³Амониец и Моавец не смее да влегува во храмот Господов; и дури ни десеттото колено нивно да не влегуваат во храмот Господов, па и довека,

⁴затоа што тие не ве престретнаа со леб и вода по патот, кога бевте излегле од Египет, и затоа што го наговорија против тебе Валаам Веоровиот син, од Месопотамија, за да те проколне.

⁵Но Господ, твојот Бог, не сакаше да го чуе Валаама и ја обрна Господ, твојот Бог, клетвата негова во благослов за тебе, бидејќи Господ твојот Бог те засака;

⁶не пожелувај им ни мир, ни добрина преку сите твои денови довека.

⁷Не гнаси се од Идумеец, бидејќи тој е твој брат; не гнаси се од Египтјанин, зашто ти беше придојден во земјата негова;

⁸Синовите нивни, родени во трето колено, можат да влезат во храмот Господов.

⁹Кога одиш во бој против непријателите свои, пази се од сѐ што е лошо.

¹⁰Ако кај тебе има некој нечист од ноќен излив, тој треба да излезе надвор од логорот и да не влегува во логорот;

¹¹а вечерта да го измие телото свое со вода, и по зајдисонце нека влезе во логорот.

¹²Ти треба да имаш место надвор од станот, каде што ќе одиш сам;

¹³освен рилец во појасот, ти треба да имаш лопатка; па кога ќе одиш таму надвор, ископај со неа земја и потоа покри ја со неа нечистотијата своја,

¹⁴бидејќи Господ, твојот Бог, дојде во логорот твој, за да те избави и да ги предаде непријателите твои во твои раце; затоа логорот твој треба да биде свет, за да не види Он кај тебе нешто нечисто и да не се оттргне од тебе.

¹⁵Не предавај го робот на господарот негов, кога ќе избега при тебе од господарот негов;

¹⁶нека живее со тебе, меѓу вас нека живее во секое место, што ќе му биде угодно; не го оскрбувај.

¹⁷Блудница од Израилевите ќерки да нема, и блудник да нема од синовите Израилеви.

¹⁸Во домот на Господа, твојот Бог, не принесувај блудничка награда, ниту цена од пес, за никаков завет, бидејќи и едното и другото се одвратност пред Господа, твојот Бог.

¹⁹Не му давај на братот свој со лихва, ниту сребро, ниту храна, ниту нешто друго, што се дава во заем со лихва;

²⁰на туѓинец давај му со лихва, а на братот свој не му давај со лихва; за да те благослови Господ, твојот Бог, во сите твои работи на земјата, во која одиш да ја наследиш.

²¹Ако Му дадеш завет на Господа, твојот Бог, бездруго исполни го, зашто Господ, твојот Бог, ќе го побара од тебе и врз тебе ќе падне грев;

²²ако, пак, не си ветил, нема да имаш грев.

²³Она што ќе излезе од устата твоја, запазувај го и исполнувај го, бидејќи со образ си Му ветил дар на Господа, твојот Бог, и доброволно си го кажал со устата своја.

²⁴Ако влезеш во нивата на ближниот свој, земи класја во рацете свои, но срп да не земаш.

²⁵Кога ќе влезеш во лозјето на ближниот свој, грозје можеш да јадеш колку што душата ти сака, но не клавај во садови.