Read Lamkang Второзаконие 25 Bible Online

Второзаконие 25 - Lamkang bible

Второзаконие 25

¹Кога има расправија меѓу луѓе, нека ги доведат во суд и да ги судат; правиот да го оправдаат, а виновниот да го осудат;

²а ако виновниот заслужува биење, да го легнат пред судиите и да го бијат поради вината негова.

³Можат да му се удрат четириесет стапа, но не повеќе, за да не се засрами братот твој пред тебе.

⁴Не врзувај уста на вол кога врши.

⁵Кога браќата живеат заедно, и едниот од нив умре без пород, жената на умрениот не смее да се омажи за надворешен човек, но деверот нејзин треба да влезе при неа, да ја земе за жена и да живее со неа, —

⁶и првородениот, што таа ќе го роди, да го носи името на умрениот брат, за да не се уништи името негово во Израилот.

⁷Ако, пак, тој не посака да ја земе за жена снаата своја, тогаш снаата негова да отиде кај портата пред старешините и да каже: »братот на мојот маж не сака да го подигне името на братот свој во Израилот, не сака да се ожени со мене.«

⁸И старешините на градот негов да го повикаат и да му зборуваат, и ако тој стане и каже: »не сакам да ја земам,«

⁹тогаш снаата негова нека дојде при него пред очите на старешините, да собуе еден чевел од неговата нога, да го плукне в лице и да каже: »така се постапува со човек, кој не го подига домот на братот свој во Израилот«;

¹⁰и ќе му извадат име во Израилот: »дом на собуениот,«

¹¹Кога се тепаат меѓусебе двајца мажи, и жената на едниот од нив се приближи за да го отргне мажот свој од оној што го бие, и, откога ќе ја испружи раката своја, го фати за слабините,

¹²пресечи ѝ ја раката: да не ја пожали окото твое.

¹³Во торбата своја не смееш да имаш две мерила: големо и мало;

¹⁴во куќата твоја да немаш двојна мерка: тешка и лесна;

¹⁵мерило да имаш верно и праведно, и мерка да имаш точна и праведна, за да ти се продолжат деновите на земјата, која Господ, твојот Бог, ти ја дава како дел;

¹⁶бидејќи одвратен е пред Господа, твојот Бог, секој што го прави ова и друга неправда.

¹⁷Помни, како постапи со тебе Амалик, по патот, кога бевте излегле од Египет;

¹⁸како тој ти се противстави по патот и ги погуби сите што заостанаа зад тебе од умор, кога ти беше алчен и изнемоштен, и не се уплаши од Бога.

¹⁹И така, кога Господ, твојот Бог, ќе те успокои од сите твои непријатели, што се околу тебе на земјата, која Господ, твојот Бог, ти ја дава како дел за да ја наследиш, избриши го името на Амалик под небото; да не заборавиш.