Read Lamkang Второзаконие 27 Bible Online

Второзаконие 27 - Lamkang bible

Второзаконие 27

¹Тогаш Мојсеј со старешините на синовите Израилеви му заповеда на народот, велејќи: »Пазете ги сите заповеди, што денес ви ги давам.

²И кога во оној ден ќе го минете Јордан во земјата, која Господ, твојот Бог, ти ја дава, како дел, постави си големи камења и обели ги со вар;

³и напиши ги на тие камења сите зборови од твојот закон, штом ќе го преминеш Јордан, за да влезеш во земјата, која Господ, твојот Бог, ти ја дава, во земјата, каде што тече мед и млеко, како што им беше говорел Господ, твојот Бог, на твоите татковци.

⁴Кога ќе го преминете Јордан, поставете ги тие камења, како што ви заповедам денес, на планината Гевал и обелете ги со вар;

⁵и изгради таму жртвеник на Господа, твојот Бог, жртвеник од камења; да не ставаш на нив железо;

⁶жртвеникот на Господа, твојот Бог, целиот изгради го од камења и принесувај врз него сепаленици на Господа, твојот Бог;

⁷принесувај и жртви за спасение, и јади и наситувај се таму, и весели се пред Господа, твојот Бог;

⁸и врз тие камења напиши го многу јасно целиот овој закон.«

⁹Тогаш Мојсеј со свештениците левити му рече на целиот Израил, велејќи: »Внимавај и слушај, Израиле: ти денес стана народ на Господа, твојот Бог.

¹⁰И така, слушај го гласот на Господа, твојот Бог, и извршувај ги сите Негови заповеди и наредби, што ти ги заповедам денес.«

¹¹И во тој ден му заповеда Мојсеј на народот, велејќи:

¹²»Кога ќе го минете Јордан, овие треба да застанат на планината Гаризим, за да го благословат народот: Симеон, Левиј, Јуда, Исахар и Венијамин;

¹³а на планината Гевал да застанат за да искажат проклетство овие: Рувим, Гад, Завулон, Дан и Нефталим.

¹⁴Левитите да го известат народот и да им кажат на сите Израилци со висок глас:

¹⁵‚проклет да е оној човек, што ќе направи изрезан или излиен идол, одвратност пред Господа, работа на уметнички раце, па го става на скришно место! Целиот народ да биде известен и нека рече: амин!

¹⁶Проклет да е оној, што го навредува таткото свој или мајката своја! И целиот народ да каже: амин!

¹⁷Проклет да е оној, кој ја поместува меѓата на ближниот свој! И целиот народ нека рече: амин!

¹⁸Проклет да е оној, кој отстранува слеп човек од патот! И целиот народ нека каже: амин!

¹⁹Проклет да е оној, кој криво суди придојден, сиромав или вдовица! И целиот народ нека рече: амин!

²⁰Проклет да е оној, кој ќе легне со жената на таткото свој, зашто тој го открил крајот од покривката на таткото свој! И целиот народ да каже: амин!

²¹Проклет да е оној, кој ќе легне со каков и да било добиток! И сиот народ нека рече: амин!

²²Проклет да е оној, кој ќе легне со сестрата своја, со татковата ќерка, или со мајкината ќерка! И целиот народ да каже: амин!

²³Проклет да е оној, кој ќе легне со тештата своја! И целиот народ нека рече: амин! Проклет да е оној, кој ќе легне со сестрата на жената своја! И целиот народ да каже: амин!

²⁴Проклет да е оној, што ќе го убие тајно ближниот свој! И целиот народ да каже: амин!

²⁵Проклет да е оној, што зема поткуп, за да погуби душа и да пролее крв невина! И целиот народ нека рече: амин!

²⁶Проклет да е секој, кој не ќе ги исполни сите наредби од оној закон и не ќе постапи според нив! И целиот народ да каже: амин!‘