Read Lamkang Јован 21 Bible Online

Јован 21 - Lamkang bible

Јован 21

¹Потоа пак им се јави Исус на учениците Свои кај Тиверијадското Море. А тоа се случи вака:

²Беа заедно Симон Петар и Тома, кого го викаа Близнак, и Натанаил од Кана Галилејска, и Заведеевите синови, и двајца други од учениците Негови.

³Симон Петар им рече: »Ќе одам да ловам риба.« Му рекоа: »И ние ќе дојдеме со тебе.« Тогаш излегоа и веднаш влегоа во кораб, но таа ноќ ништо не уловија.

⁴А кога се раздени, застана Исус на брегот, само учениците не Го познаа дека е Исус.

⁵Исус им рече: »Деца, имате ли нешто за јадење?« Му одговорија: »Не.«

⁶А Он им рече: »Фрлете ја мрежата од десната страна на коработ и ќе најдете!« Ја фрлија, и не можеа веќе да ја извлечат од многу риби.

⁷Тогаш ученикот, што го сакаше Исус, му рече на Петра: »Господ е.« А Симон Петар, штом чу дека е Господ, си ја препаша облеката — оти беше необлечен, и се фрли во морето.

⁸А другите ученици, влечејќи ја мрежата со риби, дојдоа со кораб, оти не беа далеку од брегот, но само околу двесте лакти.

⁹Кога пак излегоа на земјата, видоа накладен оган, и на него ставена риба и леб.

¹⁰Исус им рече: »Донесете од рибите што ги уловивте сега!«

¹¹А Симон Петар влезе и ја извлече мрежата на земја, полна со крупни риби, на број сто педесет и три; и макар што беа толку многу, мрежата не се скина.

¹²Исус им рече: »Дојдете, јадете!« И никој не смееше да Го праша: »Кој си Ти?«, оти гледаа дека е Господ.

¹³Се приближи Исус, зеде леб и им даде, исто така и риба.

¹⁴Ова беше веќе третпат како им се јави Исус на учениците Свои, откако воскресна од мртвите.

¹⁵А кога завршија со јадењето, Исус му рече на Симона Петра: »Симоне Јонин, Ме љубиш ли повеќе отколку овие?« Петар Му рече: »Да, Господи, Ти знаеш дека Те сакам.« Исус му рече: »Паси ги јаганцата Мои!«

¹⁶Го праша пак, повторно: »Симоне Јонин, љубиш ли Ме?« Петар Му кажа: »Да, Господи, Ти знаеш дека Те сакам.« Исус му рече: »Паси ги овците Мои!«

¹⁷И по третпат му рече: »Симоне Јонин, Ме сакаш ли?« Петар се нажали дека по третпат го праша: »Ме сакаш ли?« И Му рече: »Господи, Ти сѐ знаеш; Ти знаеш дека Те сакам.« Исус му рече: »Паси ги овците Мои!

¹⁸Вистина, вистина ти велам: кога беше помлад, сам се опашуваше и одеше каде што сакаше; кога ќе остариш, ќе ги рашириш рацете свои, и друг ќе те опаше и поведе на каде што нејќеш.«

¹⁹А ова го рече, за да покаже со каква смрт ќе Го прослави Петар Бога. И штом го кажа тоа, му рече: »Оди по Мене!«

²⁰А Петар, кога се заврти, виде дека по него оди оној, кого го милуваше Исус, и кој на вечерата се беше навалил на градите Негови и рекол: »Господи, кој ќе Те предаде?«

²¹Штом го виде Петар него, Му рече на Исуса: »Господи, а овој, пак, зошто?«

²²Исус му рече: »Ако сакам тој да остане, дури дојдам, тебе што ти е? Ти врви по Мене!«

²³И се пренесе овој збор меѓу браќата, дека тој ученик нема да умре. Но Исус не му рече дека нема да умре, туку: »Ако сакам тој да остане, додека дојдам, тебе што ти е?«

²⁴Тој е ученикот, кој сведочи за овие настани и ги напиша; и знаеме дека сведоштвото негово е вистинско.

²⁵А има многу други работи што ги изврши Исус, и кои, ако би се напишале по ред, ми се чини, не би можеле да се сместат во целиот свет напишаните книги. Амин!