Read Lamkang Дела 15 Bible Online

Дела 15 - Lamkang bible

Дела 15

¹А некои, слегнати од Јудеја, ги учеа браќата: »Ако не се обрежете според укажувањето Мојсеево, не можете да се спасите!«

²А кога настана расправија, и Павле и Варнава не малку се препираа со нив, па определија Павле и Варнава од нив и некои други да отидат горе при апостолите и старешините во Ерусалим за ова прашање.

³Тие, пак, испратени од црквата, минеа преку Финикија и Самарија, зборувајќи за обраќањето на незнабошците и предизвикуваа голема радост кај сите браќа.

⁴А кога дојдоа во Ерусалим, ги примија црквата, апостолите и старешините и рекоа сѐ што направи со нив Бог и како ја отвори вратата на верата и за незнабошците.

⁵Тогаш станаа некои од фарисејската ерес, што беа поверувале, и зборуваа дека тие треба да се обрезуваат, и да им се заповеда да го пазат Законот Мојсеев.

⁶Апостолите и старешините се собраа да го разгледаат тоа прашање.

⁷По долго расправање стана Петар и им рече: »Луѓе, браќа, вие знаете дека Бог од првите дни ме избра меѓу вас незнабошците од мојата уста да го чујат словото евангелско и да поверуваат;

⁸и Бог, Кој ги познава срцата, им посведочи, и им даде Дух Свети како и нам,

⁹и не правејќи никаква разлика меѓу нас и нив, ги очисти со верата нивните срца.

¹⁰Сега, пак, зошто го искушувате Бога, ставајќи им на вратот на учениците јарем, што не можеа да го поднесат ни нашите татковци, ниту ние.

¹¹Но ние веруваме дека ќе се спасиме со благодатта на Исуса Христа, како и тие.«

¹²Тогаш замолкна сето мноштво и го слушаа Варнава и Павла, кои прикажуваа какви знаци и чудеса направил Бог преку нив меѓу незнабошците.

¹³А кога тие престанаа, тогаш прозборува Јаков и рече: »Мажи, браќа, чујте ме!

¹⁴Симон изложи како Бог најнапред ги посети незнабошците, та од нив да избере народ што ќе го носи Неговото име;

¹⁵и со тоа се согласуваат и зборовите на Пророците како што е напишано:

¹⁶‚И потоа ќе се обрнам и ќе го обновам паднатиот дом на Давида, и неговите урнатини ќе ги поправам и ќе го издигнам,

¹⁷за да Го побараат Господа и другите луѓе и сите народи, кои се наречени со Моето име.‘ Така вели Господ, Кој го прави сето ова.

¹⁸Познати Му се на Бога сите Негови дела од создавањето на светов.

¹⁹Затоа јас мислам дека не треба да им се прават мачнотии на оние незнабошци, кои се обраќаат кон Бога,

²⁰туку да им се заповеда да се воздржуваат од идолски жртви, од блудство, од удавено и од крв, и да не му прават на друг ништо, што ним не им е угодно.

²¹Зашто Мојсеј во сите градови има луѓе од старите времиња, кои го проповедаат, оти неговиот Закон се чита по синагогите во секоја сабота.«

²²Тогаш апостолите и старешините со целата црква најдоа за добро да ги изберат меѓу себе Јуда, наречен Варсава, и Сила, луѓе истакнати меѓу браќата, и со Павла и Варнава да ги пратат во Антиохија.

²³И со своите раце им го напишаа следново: »Апостолите, свештениците и браќата ги поздравуваат обратените браќа што се во Антиохија и Сирија и Киликија.

²⁴Бидејќи чувме дека некои, што излегоа од нас, ве смутиле со зборови, и ги одвратиле душите ваши, велејќи ви да се обрезувате и да го пазите Законот, на кои ние не сме им заповедале;

²⁵та, откако се собравме, еднодушно најдовме за добро да избереме луѓе и да ги пратиме при вас заедно со нашите омилени Варнава и Павла,

²⁶луѓе, кои ги предадоа душите свои за името на нашиот Господ Исус Христос.

²⁷И така, ние ви ги пративме Јуда и Сила, кои ќе ви го кажат тоа и со зборови.

²⁸Зашто на Светиот Дух и нам ни беше угодно веќе никакво бреме да не ви ставаме освен она што е потребно:

²⁹да се воздржувате од принесување жртви на идоли и од крв, од удавено, од блудство, и да им правите на други она што вам не ви е угодно. Ако се пазите од ова, добро ќе направите. Бидете здрави!«

³⁰И така испратени, тие дојдоа во Антиохија, и, кога го собраа народот, му го предадоа посланието.

³¹А кога го прочитаа, се зарадуваа поради утехата.

³²Јуда, пак, и Сила, бидејќи и сами пророци, со многу зборови ги утешија браќата и ги утврдија.

³³Откако престојуваа таму некое време, ги отпуштија браќата со мир при апостолите.

³⁴Но Сила најде за добро да остане таму, а Јуда се врати во Ерусалим.

³⁵Павле, пак, и Варнава живееја во Антиохија, поучувајќи и благовестувајќи го словото Господово заедно со мнозина други.

³⁶По неколку дни Павле му рече на Варнава: »Да појдеме пак по сите градови, каде што го проповедавме словото Господово за да ги видиме како живеат.«

³⁷Варнава предложи да го земат со себе и Јована, наречен Марко.

³⁸Но Павле сметаше за недостојно да го земат со себе оној, што се беше одделил од нив во Памфилија и не беше пошол со нив по работата, за која беа пратени.

³⁹Поради тоа се појави расправија, така што тие се разделија еден од друг; и Варнава, откако го зеде Марка, отплови за Кипар;

⁴⁰а Павле си го избра Сила и тргна предаден на Божјата благодат од браќата.

⁴¹И, минувајќи низ Сирија и Киликија, ги утврдуваше црквите.