Read Lamkang Дела 18 Bible Online

Дела 18 - Lamkang bible

Дела 18

¹Потоа Павле ја напушти Атина и дојде во Коринт;

²и, откако најде еден Јудеец, по име Акила, родум од Понт, кој наскоро дошол од Италија со жена си Прискила, оти Клаудиј беше заповедал да го напуштат Рим сите Јудејци — дојде при нив;

³и бидејќи го имаше истиот занает, остана при нив и работеше, а занаетот им беше да прават шатори.

⁴И секоја сабота тој зборуваше во синагогата и ги убедуваше Јудејците и Елините.

⁵А кога Сила и Тимотеј слегнаа од Македонија, Павле беше подбудуван во својот дух да сведочи пред Јудејците дека Исус е Христос.

⁶Но, бидејќи тие се противеа и хулеа, тој ги истресе алиштата и им рече: »Крвта ваша — на главите ваши! Јас сум чист. Отсега одам при незнабошците.«

⁷И штом се дигна оттаму, дојде при некој си човек по име Јуст, кој го почитуваше Бога, и чија куќа беше до синагогата.

⁸А Крисп, началник на синагогата, поверува во Господа со целиот свој дом; и мнозина коринтјани, слушајќи го Павла, поверуваа и се покрстија.

⁹И му рече Господ на Павла во видение ноќе: »Не бој се, туку зборувај и не замолкнувај,

¹⁰зашто Јас сум со тебе, и никој не ќе посегне да ти направи зло; бидејќи имам многу народ во овој град.«

¹¹Тој остана таму една година и шест месеци и ги поучуваше во словото Божјо.

¹²А кога Галион беше проконсул во Ахаја, Јудејците еднодушно го нападнаа Павла и го одведоа в суд,

¹³велејќи: дека тој ги учи луѓето да Го почитуваат Бога не според Законот.

¹⁴И кога Павле сакаше да одговори, Галион им рече на Јудејците: »Јудејци, ако имаше некоја неправда или зло дело, лукаво, веднаш ќе ве ислушав по должност;

¹⁵но, штом е препирката за учење и за имиња, и за вашиот Закон, разгледајте сами, зашто јас не сакам да бидам судија во тие работи.«

¹⁶И ги истера од судот.

¹⁷Тогаш сите Елини го фатија Состена, началникот на синагогата, и го биеја пред судот, а Галион и не обрнуваше внимание на тоа.

¹⁸Откако помина таму уште доста денови, Павле се прости со браќата и отплови за Сирија заедно со Акила и Прискила, откако ја острига главата во Кенхреја, бидејќи беше дал завет.

¹⁹Кога стигна во Ефес, ги остави нив таму, а сам тој влезе во синагогата и спореше со Јудејците.

²⁰А кога тие го замолија да остане при нив подолго време, тој не се согласи,

²¹туку се прости со нив и рече: »Бездруго празникот што иде треба да го поминам во Ерусалим; и ако Бог сака, пак ќе се вратам при вас.«

²²Кога слезе во Ќесарија, отиде во Ерусалим, ја поздрави црквата и потоа отиде во Антиохија.

²³Откако престоја таму некое време, излезе и го обиколуваше по ред крајот Галатиски и Фригија и ги утврдуваше сите ученици.

²⁴И дојде во Ефес некој си Јудеец, по име Аполос, родум од Александрија, човек красноречив и силен во Писмата.

²⁵Тој беше упатен во патот Господов и, распален во духот, зборуваше и поучуваше правилно за Господа, иако знаеше само за Јовановото крштавање.

²⁶Тој почна да зборува смело во синагогата. Кога го чуја Акила и Прискила, го прибраа и му го објаснија патот Господов поточно.

²⁷А кога тој сакаше да замине за Ахаја, браќата се обрнаа со писмо до тамошните ученици, за да го примат; и тој, кога стигна таму, многу им помогна на верниците преку благодатта,

²⁸бидејќи силно ги изобличуваше Јудејците пред целиот народ, докажувајќи преку Писмата дека Исус е Христос.