Read Lamkang Дела 3 Bible Online

Дела 3 - Lamkang bible

Дела 3

¹Петар и Јован заедно влегуваа во храмот во деветтиот молитвен час.

²Имаше еден човек, фатен уште во мајчина утроба, кого го носеа и поставуваа секој ден пред вратата на храмот, наречена Красна, за да проси милостина од оние што влегуваа во храмот.

³Штом ги виде тој Петра и Јована, кога сакаа да влезат во храмот, и од нив запроси милостина.

⁴А Петар се вгледа во него заедно со Јована и му рече: »Погледај нѐ!«

⁵И тој ги гледаше настојчиво, надевајќи се од нив нешто да добие.

⁶Но Петар рече: »Сребро и злато јас немам, а — што имам, тоа ти давам — во името на Исуса Христа Назареецот стани и оди!«

⁷И како го фати за десната рака, го исправи и веднаш му се зацврснаа стапалата и глуждовите;

⁸и штом скокна, застана и прооди, и влезе во храмот заедно со нив, скокајќи и фалејќи Го Бога.

⁹И сиот народ го виде како оди и како Го фали Господа.

¹⁰А го познаа дека тој беше оној што седеше пред Красна, вратата на храмот, поради милостина; и се восхитија и се зачудија за она што му стана.

¹¹И бидејќи исцелениот хром не се одделуваше од Петра и Јована, затоа кон нив пријде сиот зачуден народ во тремот, наречен Соломонов.

¹²А Петар, штом го виде тоа, му рече на народот: »Луѓе Израилци, што се чудите на ова, и што сте се загледале во нас, како со своја сила или побожност да направивме овој да оди?

¹³Бог Авраамов, Исаков и Јаковов, Бог на татковците наши Го прослави Својот Син Исуса, Кого вие Го предадовте и од Кого се одрековте пред лицето на Пилата, кога тој реши да Го пушти.

¹⁴Но вие се одрековте од Светиот и Праведниот и измоливте да ви се подари човек убиец,

¹⁵а Началникот на животот Го убивте, Кого Бог Го воскресна од мртвите, за што сме ние сведоци.

¹⁶И поради верата во Неговото име, овој, кого вие го гледате и познавате, го потврди името Негово; а верата во Него го исцели и него пред сите вас.

¹⁷А сега, браќа, знам дека вие тоа го направивте од незнаење како и кнезовите ваши.

¹⁸Но Бог, бидејќи предвести преку устата на сите пророци Свои, дека Христос ќе пострада, така и направи.

¹⁹Покајте се, пак, и обратете се, за да се очистите од гревовите ваши,

²⁰за да дојдат времиња за освежување од лицето Господово, и Он да ви Го прати вам претскажаниот Исус Христос,

²¹Кого небото треба да Го прими до она време, кога ќе се изврши сѐ, што беше рекол Бог преку устата на сите Свои пророци од создавањето на светот.

²²Мојсеј им беше рекол на татковците: ‚Господ Бог ваш од браќата ваши ќе ви издигне Пророк како Јас; Него послушајте Го во сѐ, што ќе ви рече!‘

²³И секоја душа, што не ќе Го послуша тој Пророк, ќе биде истребена од народот.

²⁴А и сите пророци од Самуила, па и по нив, што пророкуваа, исто така и за овие денови предвестуваа.

²⁵Вие сте синови на пророците и на заветот, што Бог им го беше ветил на вашите татковци, велејќи му на Авраама: ‚И во потомството твое ќе бидат благословени сите народи на земјата.‘

²⁶Бог, откако Го воздигна Својот Син Исуса, најнапред вам ви Го прати, за да ве благослови, та секој од вас да се одврати од своите злобни работи.«