Read Lamkang Римјаните 10 Bible Online

Римјаните 10 - Lamkang bible

Римјаните 10

¹Браќа, желбата на моето срце и на мојата молитва кон Бога е да се спаси Израилот.

²Јас им сведочам дека тие имаат ревност за Бога, но не по разумот.

³Зашто, не познавајќи ја правдата Божја и гледајќи да ја воспостават својата правда, тие не ѝ се покорија на Божјата правда,

⁴бидејќи свршетокот на Законот е Христос, преку Кого ќе биде оправдан секој што верува.

⁵Мојсеј пишува за оправданието од Законот: »Кој ќе го исполни, тој ќе биде преку него жив«.

⁶А оправданието на верата вели: »Да не речеш во срцето свое: Кој ќе се возвиси на небото?«, односно да Го симне Христа, —

⁷или, »Кој ќе слезе во бездната?«, односно да Го изведе Христа од мртвите!

⁸Но што вели Писмото: »Блиску до тебе е словото, во твојата уста и во твоето срце«, односно словото на верата, што го проповедаме,

⁹оти, ако со устата Го исповедаш Господа Исуса и со срцето свое поверуваш дека Бог Го воскресна од мртвите, ќе се спасиш;

¹⁰бидејќи со срцето се верува за оправдание, а со устата се исповеда за спасение.

¹¹Пак и Писмото вели: »Секој, кој верува во Него, нема да се посрами«.

¹²Нема разлика меѓу Јудеец и Елин, зашто еден и ист е Господ на сите, богат за сите, кои Го призовуваат.

¹³Бидејќи, секој, кој го призове името Господово, ќе се спаси.

¹⁴Но како ќе Го призоват Оној, во Кого не поверувале? Како, пак, ќе поверуваат во Оној, за Кого не чуле? А како ќе чујат без проповедник?

¹⁵И како ќе проповедаат, ако не бидат испратени, како што е напишано: »Колку им се убави нозете на оние, што благовестат мир, кои го благовестат доброто«.

¹⁶Но Благовестието сите не го послушаа. Оти Исаија вели: »Господи, кој поверува во нашето проповедање?«

¹⁷И така, верата доаѓа од слушање, а слушањето — од словото Божјо.

¹⁸Но велам: зар тие не чуја? Напротив, »Гласот им се разнесе по целата земја, и зборовите нивни — до краиштата на вселената«.

¹⁹Пак велам: зар Израилот не разбра? Прв Мојсеј кажа: »Јас ќе возбудам во вас ревност не преку ништожен народ, туку преку неразумен народ«.

²⁰А Исаија смело рече: »Ме најдоа оние, кои не Ме бараа, им се открив на оние, кои не прашаа за Мене«.

²¹За Израилот, пак, вели: »Постојано ги подавав рацете Свои кон народ непослушен и упорен«.