Read Lamkang Римјаните 12 Bible Online

Римјаните 12 - Lamkang bible

Римјаните 12

¹Браќа, во името на милоста Божја, ве молам подајте ги телата ваши во жртва жива, света и благоугодна на Бога, и тоа ќе биде вашата духовна служба,

²и не управувајте се според овој век, туку преобразете се преку вашиот обновен ум, за да можете да познавате, која е добрата, угодна и совршена волја Божја.

³Зашто, преку благодатта, што ми е мене дадена, на секого од вас му кажувам да не мисли повеќе, отколку што треба да мисли; туку мислете скромно според делот на верата, што Бог на секого му го одмерил.

⁴Оти, како што во едно тело имаме многу органи, но сите членови не вршат една иста работа,

⁵па така и ние сме едно тело во Христа, а посебно еден на друг сме му органи.

⁶Според дадената благодат имаме разни дарови: ако е до пророштво, тогаш нека биде според верата;

⁷служба ли, нека служи; учител ли е — нека учи;

⁸наставник ли е — нека утешува; дарител ли, нека дарува; управител ли е, нека управува; кој што прави, нека го врши тоа со добра волја.

⁹Љубовта нека не биде лицемерна; отстранувајте се од злото, прилепувајте се кон доброто;

¹⁰еден спрема друг бидете љубезни со братска љубов: натпреварувајте се во почитувањето еден кон друг.

¹¹Во усрдноста да не сте мрзливи; духот да ви биде пламенен; служете Му на Господа;

¹²бидете радосни во надежта; во маката бидете трпеливи, а во молитвата постојани;

¹³помагајте им на светиите во нивните нужди; трудете се да бидете гостопримливи;

¹⁴благословувајте ги оние што ве гонат; благословувајте ги, но не и да ги колнете.

¹⁵Радувајте се со радосните, и плачете со расплаканите!

¹⁶Бидете помеѓу себе едномислени; не мислете за високи работи, туку држете се смирено; не мислете дека сте мудри;

¹⁷и никому не враќајте зло за зло, а размислувајте за тоа што е добро пред сите луѓе.

¹⁸Ако е можно, доколку тоа зависи од вас, бидете во мир со сите луѓе.

¹⁹Не одмаздувајте се, возљубени, за себе, туку дајте му место на Божјиот гнев. Оти е напишано: »Одмаздата е Моја. Јас ќе отплатувам — вели Господ«.

²⁰И така, ако непријателот твој е гладен, нахрани го; ако е жеден, напој го; оти, правејќи го тоа, ти ќе му натрупаш жар на главата негова.

²¹Не позволувај злото да те победи, туку победи го злото со добро.