Read Lamkang Римјаните 2 Bible Online

Римјаните 2 - Lamkang bible

Римјаните 2

¹И така, не можеш да се изговараш, о човеку, кој и да си ти, оти со каков суд судиш друг, со таков се осудуваш сам, бидејќи ти, кој судиш, го правиш истото.

²А знаеме дека Божјиот суд, навистина, паѓа врз оние, кои вршат такви работи.

³Зар мислиш, о човеку, дека ќе го избегнеш Божјиот суд ти, кој ги осудуваш оние, што прават такви работи, какви што правиш и сам?

⁴Или, пак, го презираш богатството на Божјата благост, кротост и долготрпеливост, не разбирајќи дека Божјата благост те води кон покајување?

⁵Но, според твојата упорност и непокајаното срце си собираш гнев за денот на гневот, кога ќе се открие праведниот суд од Бога,

⁶Кој секому ќе му даде според неговите дела:

⁷живот вечен на оние, кои со трпение во добрите дела бараат слава, чест и бесмртност;

⁸јарост, пак, и гнев на оние, што ѝ упорствуваат на вистината, а се покоруваат на неправдата.

⁹Мака и тага на секоја душа човечка, која прави зло, а најнапред на Јудеец, потоа и на Елин.

¹⁰Слава и чест и мир на секого, што прави добро, прво на Јудеец, а потоа и на Елин;

¹¹зашто Бог не гледа на лице.

¹²Оние, што згрешиле без Закон, без Закон ќе загинат; а оние, што згрешиле при Закон, според Законот ќе бидат и судени,

¹³бидејќи пред Бога не се праведни оние, што го слушаат Законот, а ќе бидат оправдани само оние, што го исполнуваат Законот;

¹⁴зашто незнабошците, немајќи Закон, сами од себе вршат сѐ по законот; тогаш тие, иако немаат Закон, сами во себеси се закон;

¹⁵поради тоа што делото на Законот е напишано во нивните срца, та затоа се управуваат според Законот, бидејќи нивната совест им сведочи за тоа, и нивните мисли помеѓу себе се обвинуваат или оправдуваат

¹⁶во оној ден, кога, според моето благовестие, Бог преку Исуса Христа ќе ги суди тајните на луѓето.

¹⁷Ете, ти се наречуваш Јудеец, и се потпираш на Законот, и со Бога се фалиш,

¹⁸и ја знаеш волјата Негова, и повеќе разбираш што е подобро, оти се поучуваш од Законот,

¹⁹и уверен си дека си водач на слепци, а светлина на оние, што се во мрак;

²⁰наставник на неразумни, учител на младежи, зашто образец на знаењето и вистината имаш во Законот.

²¹Но, како тоа учиш други, а себе не учиш?

²²Ти, кој проповедаш да не се краде, а крадеш; кој велиш да не се врши прељуба, а прељубодејствуваш; ти, кој се гнасиш од идолите, а крадеш од храмот;

²³ти, кој се фалиш со Законот, а престапувајќи го Законот, Го срамотиш ли Бога?

²⁴Зашто поради вас името Божјо се хули меѓу незнабошците, како што е напишано.

²⁵Обрезанието е навистина полезно, но ако го извршуваш Законот; ако, пак, правиш престапи против Законот, обрезанието твое станува необрезание.

²⁶И така, ако необрезаниот ги пази наредбите на Законот, тоа тогаш необрезанието нема ли да му се смета како обрезание?

²⁷И необрезаниот по тело, извршувајќи го Законот, нема ли да те осуди тебе, кој при Писмо и обрезание си престапник на Законот?

²⁸Оти не е оној Јудеец, кој е таков по надворешност, ниту по обрезанието, кое е надворешно, врз плотта,

²⁹туку оној, кој е внатрешно таков, и она обрезание, што е во срцето, по дух, а не по буква: него ќе го пофалуваат не луѓето, а Бог.