Read Lamkang Римјаните 9 Bible Online

Римјаните 9 - Lamkang bible

Римјаните 9

¹Ви зборувам вистина во името на Христа, не лажам — тоа го сведочи мојата совест преку Светиот Дух,

²дека ми е многу жал и срцето ме боли постојано;

³оти повеќе би сакал јас да бидам одвоен од Христа за браќата свои, моите сродници, по плот,

⁴кои се Израилци, на кои и им припаѓа посинувањето и славата и заветите и Законот, и службата кон Бога и ветувањата;

⁵нивни се и оците, од нив по плот е и Христос, Кој е Бог над сите, благословен во веки. Амин!

⁶А не е можно зборот Божји да не се оствари: бидејќи не сите што се од Израилот, се Израилци,

⁷ниту се, пак, сите семе Авраамово, за тоа што се негови чеда; но речено е: »Од Исака потомството ќе се нарече со твое име«.

⁸Односно, не чедата на телото се чеда Божји, туку чедата на ветувањето ќе се признаат како потомци.

⁹Бидејќи зборовите на ветувањето се овие: »Во тоа време ќе дојдам, и Сара ќе има син«.

¹⁰И не само таа, но и Ревека, која наеднаш зачна од Исака, нашиот татко,

¹¹зашто, уште додека не се беа родиле и не беа направиле ништо добро или лошо за да се знае дека Божјото решение во изборот не е од делата, туку од Повикувачот,

¹²ѝ беше речено: »Поголемиот ќе му робува на помалиот«,

¹³како што е напишано: »Јакова го возљубив, а Исава го намразив«.

¹⁴Што да речеме пак? Зар има неправда во Бога? Никако!

¹⁵Оти Он му рече на Мојсеја: »Кој е за помилување, ќе го помилувам, и кој е за сожалување, ќе го сожалам«.

¹⁶И така, тоа зависи не од оној, кој пожелува, ниту од оној, кој трча, туку од Бога, Кој милува.

¹⁷Зашто Писмото му вели на Фараонот: »Точно за тоа те издигнав, за да ја покажам над тебе силата Своја и името Мое да биде проповедано по целата земја«.

¹⁸Па така, кого го сака, го милува; кого го сака, го прави жесток.

¹⁹Но ќе ми речеш: »А зошто уште нѐ кори?« А кој може да се спротивстави на Неговата волја?

²⁰Ама ти, човеку, кој си, та спориш со Бога? Творението зар ќе му рече на својот мајстор: зошто си ме направил такво?

²¹Или, пак, грнчарот — нема ли право над глината, од едно и исто месиво да направи еден сад за честење, а друг за нечесна употреба?

²²Па што, ако Бог, сакајќи да го покаже гневот Свој и да ја јави Својата моќ, со голема долготрпеливост поднесе некои садови на гневот, приготвени за погибел?

²³Иако Он, за да го покаже богатството на Својата слава над садовите на милосрдноста, приготвувани од Него за слава,

²⁴нѐ помилува нас, кои нѐ повика не само од Јудејците, туку и од незнабошците,

²⁵како што и Осиј вели: »Ќе го наречам Мој народ оној, кој не беше Мој народ, и омилена — неомилената«.

²⁶И на она место, каде што ќе им се рече: »Вие не сте Мој народ; таму ќе бидат наречени синовите на живиот Бог.«

²⁷А Исаија извика за Израилот: »Иако е бројот на Израилевите синови колку што е морскиот песок, остатокот само ќе се спаси,

²⁸оти ќе го заврши делото и ќе реши по правда: Господ ќе го изврши во потполност словото на земјата«.

²⁹И како што предрече Исаија: »Ако Господ Саваот не беше ни оставил семе, ќе станевме како Содом и ќе заприлегавме на Гомор.«

³⁰Што да се рече пак? Незнабошците, кои не бараа оправдание, добија оправдание преку верата.

³¹И Израилот, кој бараше закон на правдата, не достигна до Законот на правдата.

³²Зошто? Затоа дека бараше не од верата, а од делата на Законот. Оти се сопнаа од каменот за сопнување,

³³како што е напишано: »Еве, го полагам на Сион каменот за сопнување и каменот на соблазан; и секој, кој верува во Него, нема да се посрами«.