Read Lamkang 1. Коринтјаните 14 Bible Online

1. Коринтјаните 14 - Lamkang bible

1. Коринтјаните 14

¹Стремете се кон љубовта; ревнувајте за духовните дарови, а особено да пророкувате.

²Оти оној, кој зборува на јазик непознат, тој не им зборува на луѓе, туку на Бога; бидејќи никој не го разбира, а со Духот кажува тајни;

³кој, пак, пророкува, тој им зборува на луѓето за поука, утеха и утврдување.

⁴Кој зборува на непознат јазик, тој се поучува сам; а кој пророкува, тој ја поучува Црквата.

⁵Но јас би сакал сите вие да зборувате на разни јазици, а уште повеќе да пророкувате: оти, кој пророкува, е поголем од оној, кој зборува јазици — освен ако и ги толкува, та Црквата да добие поука.

⁶А сега, ако дојдам при вас, браќа, и ви зборувам на разни јазици, каква полза ќе имате од мене, кога не ви се објаснува било со откровение, било со познавање, било со пророкување, било со поука?

⁷И бездушните предмети, како свирката или гуслата, што даваат глас, ако не даваат разни гласови, како ќе се разбере што се свири или гуди?

⁸Оти, ако трубата не дава разбирлив глас, тогаш кој ќе се готви за битка?

⁹Така и вие, ако со јазикот свој не изговарате разбирливи зборови, како ќе се разбере она што го зборувате? Ќе зборувате во ветар.

¹⁰Во светот има кој знае колку разни зборови, и ниеден од нив не е без значење.

¹¹Ако, пак, не го разбирам значењето на тие гласови, тогаш за оној што зборува ќе бидам странец, а и тој за мене туѓинец.

¹²Така и вие, бидејќи сте ревнители за духовни дарови, грижете се да ги добиете во изобилност, за поука на Црквата.

¹³Затоа, оној што зборува на стран јазик, нека се моли за дар да може да го толкува.

¹⁴Оти, ако се молам на непознат јазик, се моли мојот дух; умот, пак, мој останува бесплоден.

¹⁵Па што да се прави? Ќе Му се молам со дух, ќе се молам и со ум; ќе Го фалам Бога со дух, ќе Му пеам и со ум.

¹⁶Зашто, ако благословуваш со дух, како ќе рече »амин« на твојата благодарност простиот човек, кога не разбира што велиш?

¹⁷Ти благодариш добро, но другиот не се поучува.

¹⁸Му благодарам на Мојот Бог, оти од сите вас зборувам повеќе јазици;

¹⁹но в црква повеќе сакам да кажам пет зборови разбирливи, за да поучам и други, отколку илјадници зборови на непознат јазик.

²⁰Браќа, по умот немојте да бидете како деца; за злото бидете младенци, а по умот зрели.

²¹Во Законот е напишано: »На туѓи јазици и со туѓа уста ќе му зборувам на овој народ, но и така нема да ме послуша, вели Господ.«

²²Затоа јазиците се знак не за оние што поверувале, туку за оние што не поверувале; пророштвата, пак, не за оние што не веруваат, туку за оние што веруваат.

²³Ако, пак, целата Црква се собере на едно место и сите почнат да зборуваат на непознати јазици, а дојдат и прости луѓе или неверници, нема ли да речат дека сте полуделе?

²⁴Но, ако сите пророкуваат, а дојде некој прост човек или неверник, него сите ќе го изобличат и сите ќе го осудат,

²⁵така што тајните на срцето ќе му се откријат, и тој, откако падне на колена, ќе Му се поклони на Бога и ќе рече: »Навистина, со вас е Бог«.

²⁶Па што, браќа? Кога ќе се собирате, и секој од вас има — кој псалм, кој поука, кој јазик, кој откровение, кој толкување, — сѐ да се врши за поука.

²⁷Ако некои зборуваат на непознат јазик, нека зборуваат по двајца, или најмногу тројца, и тоа по ред, а еден да толкува.

²⁸Ако пак, нема толкувач, тогаш в црква да молчат, а нека си зборуваат во себеси и на Бога.

²⁹Пророците, пак, да зборуваат по двајца и тројца, а другите да расудуваат.

³⁰Но, ако некому што седи му дојде откровение, тогаш првиот нека замолчи.

³¹И така, еден по друг можете сите да пророкувате, та сите да се поучувате и сите да се утешувате.

³²И пророчките духови им се покоруваат на пророците;

³³оти Бог не е Бог на безредие, туку на мирот. Така е по сите цркви меѓу светиите.

³⁴Жените ваши по црквите да молчат: ним не им е позволено да зборуваат, туку да се покоруваат, како што вели и Законот.

³⁵Ако, пак, сакаат да научат нешто, нека ги прашаат мажите свои дома; зашто срамно е жена в црква да зборува.

³⁶Зар од вас излезе словото Божјо? Или, пак, само до вас стигна?

³⁷Ако некој мисли дека е пророк или исполнет со дух, нека разбере дека ова што ви го пишувам се Господови заповеди.

³⁸А кој не разбира, нека не разбира.

³⁹И така, браќа, грижете се да пророкувате, но не забранувајте да се зборува и на разни јазици.

⁴⁰Сѐ да се врши како прилега и уредно.